நாகர்கோவில், மே 20 –
தமிழ்நாடு முழுவதும் அரசு மற்றும் அரசு உதவிபெறும் பள்ளிகள் மற்றும் தனியார் பள்ளிகளில் 10ம் வகுப்பு பொதுத்தேர்வு எழுதிய மாணவ மாணவியர்களுக்கான 10ம் வகுப்பு பொதுத்தேர்வு முடிவுகள் இன்று (20.05.2026) தமிழ்நாடு அரசுத்தேர்வுகள் இயக்ககத்தால் வெளியிடப்பட்டது. இதில் கன்னியாகுமரி மாவட்டம் மாநில அளவில் 5 இடத்தினை எட்டியுள்ளது. இதற்கான பாராட்டு நிகழ்ச்சி மாவட்ட ஆட்சித்தலைவர் அழகுமீனா, தலைமையில் கலெக்டர் அலுவலக குறள் கூட்டரங்கில் நடைபெற்றது.
தொடர்ந்து கலெக்டர் கூறியதாவது: கன்னியாகுமரி மாவட்டத்தில் அரசு, அரசு உதவி பெறும் மற்றும் தனியார் பள்ளிகளில் 10ம் வகுப்பு படித்த 10,615 மாணவர்களும், 10,733 மாணவிகளும் என மொத்தம் 21,348 மாணவ மாணவியர்கள் தேர்வு எழுதினார்கள். அதில் 10,214 மாணவர்களும், 10,557 மாணவியர்களும் என மொத்தம் 20,771 மாணவ மாணவியர்கள் தேர்ச்சி பெற்று தமிழ்நாடு அளவில் 97.30 சதவீதம் பெற்று 5 வது இடம் பெற்றுள்ளது.
மேலும் அரசு பள்ளிகளில் 3,100 மாணவர்களும், 3,039 மாணவிகளும் என மொத்தம் 6,139 மாணவ மாணவியர்கள் எழுதியுள்ளார்கள். அதில் 2,921 மாணவர்களும், 2,955 மாணவிகளும் என மொத்தம் 5,876 மாணவ மாணவியர்கள் தேர்ச்சி பெற்று 95.71 சதவீதம் பெற்று தமிழ்நாடு அரசுப்பள்ளிகள் அளவில் நமது மாவட்டம் 7 வது இடம் பெற்றுள்ளது.
இவற்றில் மாவட்ட ஆதிதிராவிடர் நலத்துறையின் கீழ் செயல்படும் பள்ளிகளில் பயின்ற மாணவ, மாணவியர்கள் பொதுத்தேர்வில் 100 சதவீதம் தேர்ச்சி பெற்றுள்ளனர். பழங்குடியினர் நலத்துறையின் கீழுள்ள பள்ளிகளில் பயின்ற மாணவ, மாணவியர்கள் 98.5 சதவீதம் தேர்ச்சி பெற்றுள்ளனர்.
தேர்வில் வெற்றி பெற்ற அனைத்து மாணவ மாணவியர்களுக்கும் வாழ்த்துக்களையும், பாராட்டுக்களையும் தெரிவித்துக்கொள்கிறேன். இதற்காக சிறப்பாக பணியாற்றிய மாவட்ட முதன்மை கல்வி அலுவலர், மாவட்ட கல்வி அலுவலர்கள், மாவட்ட ஆட்சியரின் நேர்முக உதவியாளர் கல்வி, தலைமையாசிரியர்கள், ஆசிரியர்கள் உள்ளிட்ட அனைவருக்கும் எனது வாழ்த்துக்களை தெரிவித்துக்கொள்கிறேன். மாணவ மாணவியர்களுக்கு உறுத்துணையாக இருந்து ஊக்கப்படுத்திய பெற்றோர்களுக்கும் என பாராட்டுகளை தெரிவித்துக்கொள்கிறேன் என கூறினார்.
நடைபெற்ற நிகழ்ச்சியில் மாவட்ட முதன்மை கல்வி அலுவலர் பிரின்ஸ் ஆரோக்கிய ஜெயராஜ், மாவட்ட கல்வி அலுவலர்கள் ஜெயராஜ் (நாகர்கோவில்), சௌந்தர ராஜா (மார்த்தாண்டம்), அஜிதா (தனியார் பள்ளிகள்) உட்பட பலர் கலந்து கொண்டார்கள்.
