மார்த்தாண்டம், நவ. 24 –
களியக்காவிளை அருகே மடிச்சல் பகுதியை சேர்ந்தவர் வினோ என்பவர் மகன் அஜின் (23). அதங்கோடு பகுதியை சேர்ந்தவர் சோமராஜ் மகன் சஜின் (22). இருவரும் நண்பர்கள். இவர்கள் ஊதாரித்தனமாக சுற்றி வந்ததாக கூறப்படுகிறது. இந்த நிலையில் அஜினுக்கும் மடிச்சல் பகுதியை சேர்ந்த டிரைவர் ஒருவரின் 18 வயது மகளுக்கும் பழக்கம் ஏற்பட்டுள்ளது. அந்த பெண் கல்லூரியில் படித்து வருகிறார். இந்த காதல் விவகாரத்தை நண்பர் சஜினிடம் தெரிவித்துள்ளார்.
அஜின் மாணவியிடம் காதல் வார்த்தைகள் கூறி பல்வேறு இடங்களுக்கு அழைத்து சென்று உள்ளார். அப்போது சஜினும் உடன் சென்றாராம். இதனால் சஜினையும் அந்த இளம்பெண்ணுக்கு அறிமுகம் செய்து வைத்துள்ளார். இதற்கிடையில் அஜின் மாணவிக்கு திருமண ஆசை வார்த்தை கூறி பலாத்காரம் செய்துள்ளார். இதன் பின்னர் சிறு நாட்களுக்கு பின் அஜினுக்கும் மற்றொரு பெண்ணுக்கும் பழக்கம் ஏற்பட்டுள்ளது. இதனை அவர் சஜினிடம் கூறியுள்ளார்.
இதற்கிடையே சஜின் அந்த கல்லூரி மாணவியிடம் காதலன் வேறு ஒரு பெண்ணை காதலித்து வருவதாக கூறியுள்ளார். இதனால் இளம் பெண் மன வேதனையடைந்தார். இதையடுத்து சஜின் அந்த மாணவியிடம் தயவாக பேசி அவருடன் காதல் வார்த்தைகளை கூறியுள்ளார். மேலும் அந்த மாணவியைத்தான் திருமணம் செய்வதாக கூறி அவரை பல்வேறு இடங்களுக்கு அழைத்து சென்று பலாத்காரம் செய்துள்ளார். மேலும் சஜின் மாணவியிடம் இரண்டு பவுன் நகையை வாங்கிவிட்டு தலைமறைவானார்.
இந்த நிலையில் தற்போது கல்லூரி மாணவி 2 மாத கர்ப்பமாக உள்ளார். இதனால் அதிர்ச்சி அடைந்த பெற்றோர் மார்த்தாண்டம் மகளிர் போலீசில் புகார் செய்தனர். போலீசார் வழக்கு பதிவு செய்து நேற்று முன்தினம் இரவு அஜின் மற்றும் சஜினை கைது செய்தனர். கைதான இரண்டு வாலிபர்களையும் போலீசார் சிறையில் அடைத்தனர்.
