தமிழ்நாடு, நவ.03.
அதிமுக முன்னாள் அமைச்சர் விஜயபாஸ்கர் மற்றும் அவரது மனைவி ரம்யாவுக்கு அமலாக்கத்துறை (ED) சம்மன் அனுப்பியுள்ளது. சொத்துக்குவிப்பு வழக்கு தொடர்பாக இருவரும் சென்னையில் உள்ள அமலாக்கத்துறை அலுவலகத்தில் நேரில் ஆஜராகி விளக்கம் அளிக்க உத்தரவிடப்பட்டுள்ளது.
வெள்ளிக்கிழமை ஆஜராக விஜயபாஸ்கருக்கு உத்தரவு
விஜயபாஸ்கர் வரும் வெள்ளிக்கிழமை அமலாக்கத்துறை அலுவலகத்தில் ஆஜராக வேண்டும் என்றும், அவரது மனைவி ரம்யா அடுத்த வாரம் ஆஜராக வேண்டும் என்றும் சம்மனில் தெரிவிக்கப்பட்டுள்ளது.
ரூ.35.79 கோடி சொத்துக்குவிப்பு புகார்
கடந்த 2016 முதல் 2021 வரையிலான அதிமுக ஆட்சிக் காலத்தில் விஜயபாஸ்கர் ரூ.35.79 கோடி அளவுக்கு வருமானத்துக்கு அதிகமாக சொத்துகள் சேர்த்ததாகக் குற்றச்சாட்டு எழுந்துள்ளது. இதுதொடர்பாக சட்டவிரோத பணப்பரிவர்த்தனை தடுப்புச் சட்டத்தின் கீழ் அமலாக்கத்துறை விசாரணை மேற்கொண்டு வருகிறது.
இந்த விசாரணையின் ஒரு பகுதியாகவே விஜயபாஸ்கர் மற்றும் அவரது மனைவி ரம்யாவுக்கு சம்மன் அனுப்பப்பட்டுள்ளது. இருவரும் விசாரணைக்கு ஆஜராகும் நிலையில், இந்த வழக்கு தொடர்பான அடுத்தகட்ட நடவடிக்கைகள் கவனம் பெற்றுள்ளன.
