கன்னியாகுமரி, ஜூன் 19 –
ராகுல்காந்தியின் 56வது பிறந்தநாளை முன்னிட்டு ஆந்திர மாநில ராஹா உதய இந்தியா அமைப்பின் சார்பில் கன்னியாகுமரி முதல் காஷ்மீர் வரையிலான நடைபயணத்தை காங்கிரஸ் கட்சி நிர்வாகி இன்று தொடங்கினர்.
ஆந்திர மாநில காங்கிரஸ் கட்சியின் நிர்வாகியும் உயர் நீதிமன்ற வக்கீலுமான கட்டோரி வெங்கடேஷ்வரலு, இந்தியாவின் பிரதமராக ராகுல்காந்தி வரவேண்டும், அனைத்து மக்களும் ஒற்றுமையாக வாழ வேண்டும் உள்ளிட்ட கோரிக்கைகளை வலியுறுத்தி கன்னியாகுமரி ராஜீவ்காந்தி சிலை முன்பு இருந்து தனது நடைபயணத்தை இன்று துவக்கினார். நிகழ்ச்சிக்கு தலைமை வகித்த குமரி கிழக்கு மாவட்ட காங்கிரஸ் தலைவர் கே.டி.உதயம் கொடியசைத்து நடைபயணத்தை துவக்கி வைத்தார்.
இந்த நடைபயணம் இந்தியாவின் பல்வேறு மாநிலங்கள் வழியாக சுமார் 4 ஆயிரம் கி.மீட்டர் தூரத்தை கடந்து அடுத்த ஆண்டு (2027) ஜனவரி மாதத்தில் காஷ்மீரில் நிறைவு செய்கிறார். நிகழ்ச்சியில் அகஸ்தீஸ்வரம் வட்டார தலைவர் சாம்சுரேஷ்குமார், மாவட்ட பொது செயலாளர் தாமஸ், கன்னியாகுமரி நகர தலைவர் சந்தியாகு ராயப்பன், துணை தலைவர் கிருஷ்ணன் பிள்ளை, மற்றும் நிர்வாகிகள் அகில இந்திய காங்கிரஸ் பொது குழு உறுப்பினர் ஆரோக்கியராஜன், பாண்டியன், மாவட்ட பொது செயலாளர் சாமுவேல் சேகர் உள்ளிட்ட பலர் கலந்து கொண்டனர்.
முன்னதாக கன்னியாகுமரி காந்தி மண்டப அஸ்தி கட்டிடம், காந்தி மண்டப வளாகத்தில் உள்ள பாரதமாதாசிலை மற்றும் காமராஜர் சிலை, பழைய பஸ் ஸ்டாண்ட் ஜங்ஷனில் உள்ள ராஜீவ்காந்தி முழு உருவ சிலைக்கு மாலை அணிவித்து மரியாதை செலுத்தினர்.
