ஆந்திர மாநிலம், நவ.04.
ஆந்திர மாநிலம் ஓங்கோல் அருகே கரையைக் கடந்த ‘முரசு’ புயலால் மாநிலத்தின் பல்வேறு பகுதிகளில் கனமழை மற்றும் பலத்த காற்று வீசியது. மணிக்கு 120 கி.மீ. வேகத்தில் வீசிய சூறாவளிக் காற்றால் மரங்கள், மின்கம்பங்கள் சாய்ந்தன. பாபட்லா, ஓங்கோல், காக்கிநாடா, ஏலூரு, நெல்லூர் உள்ளிட்ட 15 மாவட்டங்களில் கனமழை பெய்ததால் தாழ்வான பகுதிகளில் வெள்ளம் புகுந்தது. இதன் காரணமாக நெல், பருத்தி, மிளகாய் உள்ளிட்ட பயிர்கள் என மொத்தம் 30,661 ஹெக்டேர் விவசாய நிலங்கள் சேதமடைந்துள்ளன. ஏராளமான கால்நடைகளும் வெள்ளத்தில் அடித்துச் செல்லப்பட்டுள்ளன.
15 மாவட்டங்களில் தொடரும் கனமழை
புயல் கரையைக் கடந்த பின்னரும் ஆந்திராவின் 15 மாவட்டங்களில் மழை தொடர்ந்து பெய்து வருகிறது. தென் கடலோர மாவட்டங்கள் மற்றும் ராயலசீமா பகுதிகளில் அடுத்த இரண்டு நாட்களுக்கு மழை நீடிக்கும் என விசாகப்பட்டினம் வானிலை ஆய்வு மையம் எச்சரித்துள்ளது. பல்வேறு இடங்களில் மரங்கள் மற்றும் மின்கம்பங்கள் சரிந்து விழுந்ததால் மின்சார விநியோகமும் பாதிக்கப்பட்டுள்ளது.
10,805 பேர் நிவாரண முகாம்களில் தங்கவைப்பு
புயல் பாதிப்புகளைத் தொடர்ந்து ஆந்திர முதல்வர் சந்திரபாபு நாயுடு மாவட்ட ஆட்சியர்கள் மற்றும் உயர் அதிகாரிகளுடன் காணொலி வாயிலாக ஆலோசனை நடத்தினார். இதுகுறித்து அவர் கூறுகையில், வெள்ளத்தால் பாதிக்கப்பட்ட பகுதிகளில் 171 நிவாரண முகாம்கள் அமைக்கப்பட்டு, 10,805 பேர் தங்க வைக்கப்பட்டுள்ளனர். இதுவரை 14,810 உணவுப் பொட்டலங்கள் விநியோகிக்கப்பட்டுள்ளன. மீட்புப் பணிகளில் 11 தேசிய பேரிடர் மீட்புக் குழுக்களும், 13 மாநில பேரிடர் மீட்புக் குழுக்களும் ஈடுபட்டுள்ளன என்றார்.
மீட்புப் பணிகள் தீவிரம்
மேலும், மின்சார வசதிகளைச் சீரமைக்கவும், சாலைகளில் விழுந்த மரங்களை அகற்றவும் நடவடிக்கைகள் மேற்கொள்ளப்பட்டு வருகின்றன. இதற்காக 613 ஜெனரேட்டர்கள் பயன்படுத்தப்படுவதுடன், 185 குழுக்கள் களத்தில் பணியாற்றி வருகின்றன. புயலுக்கு முன்னதாகவே 3,066 கர்ப்பிணிப் பெண்கள் மற்றும் 1,008 இளம் தாய்மார்கள் பாதுகாப்பு கருதி மருத்துவமனைகளில் தங்க வைக்கப்பட்டனர். 13 மாவட்டங்களில் 725 மருத்துவக் குழுவினர் மற்றும் 362 ஆம்புலன்ஸ்கள் தயார் நிலையில் வைக்கப்பட்டுள்ளன.
4,095 கிராமங்களில் மின்சாரம் துண்டிப்பு
புயல் குறித்த முன்னெச்சரிக்கைத் தகவல்கள் 3.77 கோடி பேரின் செல்போன்களுக்கு அனுப்பப்பட்டதாக முதல்வர் தெரிவித்தார். பாதுகாப்பு நடவடிக்கையாக 4,095 கிராமங்களில் மின் விநியோகம் தற்காலிகமாக நிறுத்தப்பட்டது. சேதமடைந்த பயிர்கள் மற்றும் வெள்ளத்தால் பாதிக்கப்பட்ட பகுதிகளில் மீட்பு மற்றும் நிவாரணப் பணிகள் போர்க்கால அடிப்படையில் தொடர்ந்து நடைபெற்று வருகின்றன.
