கிருஷ்ணகிரி, அக்.17.
கிருஷ்ணகிரி மாவட்டம், ஊத்தங்கரையில் அமைச்சர் ச. கீர்த்தனா பல்வேறு வளர்ச்சித் திட்டப் பணிகளைத் தொடங்கி வைத்து, பொதுமக்களுக்குப் பல்வேறு நலத்திட்ட உதவிகளை வழங்கினார். காரப்பட்டு அரசு மேல்நிலைப் பள்ளியில் ரூ.98.96 லட்சம் மதிப்பிலும், ஊத்தங்கரை அரசு மேல்நிலைப் பள்ளியில் ரூ.49.48 லட்சம் மதிப்பிலும் கட்டப்பட்ட புதிய வகுப்பறைக் கட்டிடங்களைத் திறந்து வைத்தார். மேலும், நியாயவிலைக் கடைகள் மூலம் குடும்ப அட்டைதாரர்களுக்கு 2 கிலோ ராகி வழங்கும் திட்டத்தையும் தொடங்கி வைத்தார்.
தொடர்ந்து, திருவணப்பட்டி மற்றும் மேட்டுத்தாங்கல் கிராமங்களில் தலா ரூ.45 லட்சம் மதிப்பில் கட்டப்பட்ட துணை சுகாதார மையங்களையும், இரண்டு புதிய நியாயவிலைக் கடைகளையும் திறந்து வைத்தார். பயனாளிகளுக்குப் புதிய மின்னணு குடும்ப அட்டைகள் மற்றும் அரசு நலத்திட்ட உதவிகளையும் வழங்கினார்.
நிகழ்ச்சியில் பேசிய கிருஷ்ணகிரி எம்எல்ஏ பா. முகுந்தன், நியாயவிலைக் கடைகளில் பொருட்கள் எடை குறைவாக வழங்கப்பட்டால் பொதுமக்கள் கேள்வி எழுப்பி, சரியான எடையில் பொருட்களைப் பெற வேண்டும் என வலியுறுத்தினார்.
