தென்தாமரைகுளம், ஆக. 28 –
பள்ளி கல்வித்துறை சார்பில் நாகர்கோவில் அண்ணா விளையாட்டரங்கில் நடைபெற்ற குடியரசு மற்றும் பாரதியார் தின விளையாட்டுப் போட்டிகளில் தென்தாமரைக்குளம் எல்.எம்.எஸ். மேல்நிலைப்பள்ளி மாணவிகள் தங்கம் பதக்கம் உட்பட 10 பதக்கங்களை பெற்று சாதனை படைத்துள்ளனர். பள்ளி கல்வித்துறை சார்பில் அகஸ்தீஸ்வரம் வட்ட அளவிலான குடியரசு மற்றும் பாரதியார் தின விளையாட்டுப் போட்டிகள் நாகர்கோவில் அண்ணா விளையாட்டு அரங்கத்தில் வைத்து நடைபெற்றது.
இதில் தென்தாமரைகுளம் எல்.எம்.எஸ். மேல்நிலைப்பள்ளியின் மாணவ மாணவிகள் கலந்து கொண்டனர். இதில் தடை தாண்டி ஓட்டம், உயரம் தாண்டுதல், மும்முறை தாண்டுதல், நீளம் தாண்டுதல், தொடர் ஓட்டம் உள்ளிட்ட போட்டிகளில் கலந்து கொண்ட மாணவிகள் தங்கப்பதக்கம் உட்பட 10 பதக்கங்களை பெற்று சாதனை புரிந்துள்ளனர். சாதனை புரிந்த மாணவிகளை பள்ளியின் தாளாளர் கால்வின், தலைமை ஆசிரியை அனு ஜெ. பிரீதா, பயிற்சியாளர்கள் அசோக்குமார், பவித்ரா மற்றும் ஆசிரிய, ஆசிரியைகள் பாராட்டினர்.
