நாகர்கோவில், ஆக. 4 –
தஞ்சாவூரில் நடைபெற்ற ஆர்ப்பாட்டத்தில், எதிர்க்கட்சித் தலைவர் உதயநிதி ஸ்டாலின், முதலமைச்சர் விஜய் குறித்துப் பேசிய கருத்துகள் சர்ச்சையை ஏற்படுத்தியுள்ளது. பெண்களை இழிவுபடுத்தும் வகையில் பேசிய உதயநிதி மீது நடவடிக்கை எடுக்கக் கோரி பல்வேறு பெண்கள் அமைப்பினரும் போர்க்கொடி தூக்கியுள்ளனர்.
இதனைத் தொடர்ந்து தமிழகம் முழுவதும் தமிழக வெற்றிக் கழக நிர்வாகிகள் போராட்டத்தில் ஈடுபட்டனர். கன்னியாகுமரி கிழக்கு மாவட்ட தமிழக வெற்றிக் கழகம் சார்பில் நாகர்கோவில் வடசேரியில் இன்று ஆர்ப்பாட்டம் நடைபெற்றது. மாவட்டச் செயலாளர் மாதவன் தலைமையில் நடைபெற்ற இந்த ஆர்ப்பாட்டத்தில் முன்னாள் அமைச்சர் பச்சைமால், கவுன்சிலர்கள் ஸ்ரீலிஜா, அக்சயா கண்ணன், இளைஞர் அணி இணை அமைப்பாளர் தங்கராஜ், காமராஜ் கண்ணன், செயற்குழு உறுப்பினர் சக்தி குமரன், மாநகர இணைச் செயலாளர் முத்துப்பாண்டி, ஸ்ரீ கிருஷ்ணா பவுண்டேஷன் இயக்குனரும் தொழிலதிபருமான பால்ராஜ், தென்மண்டல நிர்வாகி சுந்தர்ராஜ், மகளிர் அணி நிர்வாகிகள் பாக்கியலட்சுமி, ஷீலா, ஆரல்வாய்மொழி பேரூராட்சி கவுன்சிலர் நவமணி மற்றும் வக்கீல் ராம் சுந்தர், அம்மு ஆன்றோ, செந்தில் முருகன் உள்பட நூற்றுக்கணக்கான மகளிர் அணியினரும் கட்சி நிர்வாகிகளும் கலந்து கொண்டனர்.
ஆர்ப்பாட்டத்தில் கலந்து கொண்டவர்கள் உதயநிதிக்கு எதிராக கோஷங்களை எழுப்பினர். இதனைத் தொடர்ந்து உதயநிதி மீது நடவடிக்கை எடுக்கக் கோரி கன்னியாகுமரி கிழக்கு மாவட்ட மகளிர் அணி நிர்வாகிகள், வடசேரி போலீஸ் நிலையத்தில் புகார் அளித்தனர். அதில், முதலமைச்சரின் நற்பெயருக்குக் களங்கம் விளைவிக்கும் ஒரே நோக்கத்தில், ஆர்ப்பாட்டத்தில் உதயநிதி ஸ்டாலின், பெண்களையும் முதலமைச்சரையும் கொச்சைப்படுத்தும் வகையில் பேசியுள்ளார். அவர் மீதும், இக்கருத்துகளைச் சமூக ஊடகங்களில் பரப்பிய திமுக ஐ.டி. விங் நிர்வாகிகள் மீதும் உரிய நடவடிக்கை எடுக்க வேண்டும் என புகாரளித்தனர்.
