கிருஷ்ணகிரி ,அக் : 13
திமுகவில் இரண்டு சட்டமன்றத் தொகுதிகளுக்கு ஒரு மாவட்டச் செயலாளர் என்ற அடிப்படையில் அமைப்பு மாற்றம் குறித்த எதிர்பார்ப்பு எழுந்துள்ள நிலையில், கிருஷ்ணகிரி மாவட்டத்தின் மூன்றாவது மாவட்டச் செயலாளர் யார் என்ற கேள்வி கட்சி நிர்வாகிகள் மத்தியில் பேசுபொருளாகியுள்ளது.
தற்போது கிழக்கு மாவட்டச் செயலாளராக தே. மதியழகனும், மேற்கு மாவட்டச் செயலாளராக ஒய். பிரகாஷும் செயல்பட்டு வருகின்றனர். புதிய பிரிப்பு நடைமுறைக்கு வந்தால், பர்கூர் மற்றும் ஊத்தங்கரை தொகுதிகளுக்கு புதிய மாவட்டச் செயலாளர் நியமிக்கப்படலாம் என நிர்வாகிகள் மத்தியில் எதிர்பார்ப்பு நிலவுகிறது.
இந்த நிலையில், ஊத்தங்கரை வடக்கு ஒன்றியச் செயலாளர் மூன்றம்பட்டி குமரேசனின் பெயர் முன்னிறுத்தப்படுவதாக அவரது ஆதரவாளர்கள் தெரிவிக்கின்றனர்.
சுமார் 31 ஆண்டுகளாகக் கட்சிப் பணியாற்றி வரும் அவர், உள்ளாட்சிப் பணிகள், அடிப்படை வசதிகள் மற்றும் ஏழை மக்களுக்கான நலத்திட்ட உதவிகளில் கவனம் செலுத்தி வருவதாகக் கூறப்படுகிறது. அவருக்கு மாவட்டச் செயலாளர் பொறுப்பு வழங்கப்பட்டால், ஊத்தங்கரை மற்றும் பர்கூர் தொகுதிகளில் கட்சியை மேலும் வலுப்படுத்த முடியும் என்பது அவரது ஆதரவாளர்களின் நம்பிக்கை.
இருப்பினும், புதிய மாவட்டச் செயலாளர் நியமனம் மற்றும் தொகுதிப் பிரிப்பு குறித்து தலைமைக்கழகத்தின் அதிகாரப்பூர்வ அறிவிப்பு வெளியாகவில்லை.
