நாகர்கோவில் ஆக 4
குமாரி மாவட்டத்தில் ஏராளமான சுற்றுலா தலங்கள் இருந்தாலும் சுற்றுலா பயணிகள் அதிகளவு விரும்பும் சுற்றுலா இடமாக இருப்பது திற்பரப்பு அருவி, இங்கு வார விடுமுறை மற்றும் தொடர் விடுமுறை நாட்களில் ஏராளமான சுற்றுலா பயணிகள் குடும்பத்தினருடன் வருகை தருவது வழக்கம். ஆனால் கடந்த சில தினங்களாகவே குமரி மாவட்டத்தில் கனமழை பெய்து வருகின்றது. அதனால் மாவட்டம் முழுவதும் தற்போது குளுமையான சூழல் நிலவி வரும் நிலையில் நாகர்கோவில் குளச்சல், தக்கலை, பூதப்பாண்டி புறநகர் பகுதிகளிலும் கன மழை பெய்தது.
மலை பகுதியான பேச்சிப்பாறை அணை பகுதியில் மழை பெய்து வருவதினால் அணைகளின் நீர்வரத்து சற்று அதிகரித்து காணப்பட்ட நிலையில் அணைகளின் நீர்மட்டம் முழு கொள்ளளவை எட்டியது, அதனால் பொதுப்பணித்துறை அதிகாரிகள் அணைகளை தொடர்ந்து கண்காணித்து வரும் நிலையில் அணையில் இருந்து உபரி நீர் வெளியேற்றப்பட்டு வந்ததால் கோதையாற்றில் வெள்ளம் கரைபுரண்டு ஓடுகின்றது.
திற்பரப்பு அருவியில் தண்ணீர் ஆர்ப்பரித்து கொட்டியது அதனால் அங்குள்ள சிறுவர் பூங்கா மூழ்கடித்து தண்ணீர் சென்றதால் சுற்றுலாப் பயணிகள் அருவியில் குளிக்க தடை விதிக்கப்பட்டிருந்த நிலையில் தற்போது தண்ணீர் வரத்து கணிசமாக குறைந்துள்ளது, மீண்டும் திற்பரப்பு அருவியில் சுற்றுலாப் பயணிகள் குளிக்க அனுமதி வழங்கப்பட்டுள்ளது.
ஆனால் மாவட்ட நிர்வாகம் தொடர்ந்து கண்காணிப்பு பணியில் ஈடுபட்டு வருகின்றனர். குலசேகரம் பகுதியில் கனமழை பெய்து வந்ததால் ரப்பர் தோட்டங்களில் பால் உற்பத்தி பாதிக்கப்பட்டுள்ளதாக தொழிலாளர்கள் வேதனை தெரிவித்தனர், மழையின் அளவு குறைந்ததால் தற்போது ரப்பர் தொழில் தொடங்கியுள்ளனர்.
மூன்று நாட்களுக்குப் பிறகு சுற்றுலாப் பயணிகள் திற்பரப்பு அருவியில் குளிக்க அனுமதி வழங்கியுள்ளதால் சுற்றுலாப் பயணிகள் மகிழ்ச்சியுடன் வருகை தந்து உற்சாக குளியல் போடுகின்றனர். ஆனாலும் மீண்டும் தண்ணீர் வரத்து அதிகரித்தால் சுற்றுலா பயணிகள் குளிக்க தடை விதிக்கப்படும் என தெரிவிக்கப்பட்டுள்ளது.
