இரவு நேரங்களில் மூடப்படும் அரசு மருத்துவமனை?

சிவகங்கை, செப்.19.

சிவகங்கை மாவட்டம் காரைக்குடி அருகே பள்ளத்தூரில் வார்டு எண் 12-ல் அரசு பெண்கள் மற்றும் குழந்தைகள் நல மருத்துவமனை செயல்பட்டு வருகிறது. சுற்றுவட்டார பகுதிகளைச் சேர்ந்த 100-க்கும் மேற்பட்டோர் தினமும் பல்வேறு சிகிச்சைகளுக்காக மருத்துவமனைக்கு வந்து செல்வதாக கூறப்படுகிறது.

மருத்துவர்கள் மற்றும் பணியாளர்கள் பற்றாக்குறையால் நோயாளிகள் நீண்ட நேரம் காத்திருக்க வேண்டிய நிலை உள்ளதாகவும், ரத்தப் பரிசோதனை மற்றும் மருந்து வழங்கும் பிரிவுகளில் பணியாளர்கள் இல்லாததால் சிரமம் ஏற்படுவதாகவும் வார்டு உறுப்பினர் சக்கரவர்த்தி என்ற சோலைமலை தெரிவித்துள்ளார். மேலும், இரவு நேரங்களில் பணியாளர்கள் பற்றாக்குறையால் மருத்துவமனை பூட்டப்படும் நிலை இருப்பதாகவும், இதுகுறித்து மாவட்ட நிர்வாகமும் தமிழக அரசும் நடவடிக்கை எடுக்க வேண்டும் என அவர் கோரிக்கை விடுத்துள்ளார்.