சென்னை, 15.08.2026
சென்னை புனித ஜார்ஜ் கோட்டையில் நடைபெற்ற 80வது சுதந்திர தின விழாவில், முதல்வர் விஜய் தேசியக் கொடியை ஏற்றி வைத்து மரியாதை செலுத்தினார். காவல் அணிவகுப்பு மரியாதையை ஏற்றுக்கொண்ட அவர், சபாநாயகர், அமைச்சர்கள், உயர் அதிகாரிகள் உள்ளிட்டோருக்கு கைகூப்பி வரவேற்பு தெரிவித்தார். தொடர்ந்து சுதந்திர தின விழாவில் உரையாற்றிய முதல்வர், நாட்டின் விடுதலைக்காக உயிர் தியாகம் செய்த பிரபலமான மற்றும் பெயர் தெரியாத சுதந்திரப் போராட்ட வீரர்களுக்கு வீர வணக்கம் செலுத்தினார்.
உண்மையான சுதந்திரம் என்பது சாதி, மதம், மொழி, இனம் உள்ளிட்ட வேறுபாடுகளை கடந்து மக்கள் ஒன்றிணைவதில்தான் உள்ளது என முதல்வர் விஜய் தெரிவித்தார். தமிழ்நாட்டை லஞ்சம், ஊழல் மற்றும் போதைப்பொருள் கலாச்சாரத்தில் இருந்து காப்பாற்றுவதும் விடுதலைக்கு சமமானது எனக் கூறிய அவர், வெளிப்படையான மற்றும் நேர்மையான நிர்வாகத்தை வழங்க அரசு செயல்பட்டு வருவதாக தெரிவித்தார். மக்கள் நலனே அரசின் முதன்மை நோக்கம் என்றும், தமிழ்நாட்டின் நலனுக்கு எதிரான மத்திய அரசின் முடிவுகளை தவெக அரசு தொடர்ந்து எதிர்க்கும் என்றும் கூறினார்.
முந்தைய ஆட்சிகளில் செயல்படுத்தப்பட்ட மக்கள் நலத் திட்டங்கள் தொடர்ந்து செயல்படுத்தப்படும் எனவும் முதல்வர் அறிவித்தார். குறிப்பாக, அம்மா உணவகத் திட்டம் மேலும் மெருகேற்றப்படும் என்றும், காலை உணவுத் திட்டம் 6 முதல் 8ஆம் வகுப்பு மாணவர்களுக்கும் விரிவுபடுத்தப்பட்டு, வரும் செப்டம்பர் 17ஆம் தேதி தொடங்கப்படும் என்றும் தெரிவித்தார்.
386 ஆண்டுகள் பழமையான புனித ஜார்ஜ் கோட்டையில் 80வது சுதந்திர தினத்தன்று தேசியக் கொடியை ஏற்றி மக்களிடையே உரையாற்ற வாய்ப்பு வழங்கியதற்காக தமிழ்நாட்டு மக்கள், உலகத் தமிழர்கள் மற்றும் தனது கட்சித் தொண்டர்களுக்கு முதல்வர் விஜய் நன்றி தெரிவித்தார்.
