தென்தாமரைகுளம், ஜூன் 15 –
தென்தாமரைகுளம் அருகே உள்ள காட்டுவிளை பகுதியை சேர்ந்தவர் டென்னிஸ் (66). அரசு சாலை ஒப்பந்தக்காரரான இவரது இரண்டாவது மகன், பி.இ. படித்து விட்டு வேலை தேடிவந்துள்ளார். இந்நிலையில் அப்பகுதியை சேர்ந்த பெண் ஒருவர் மூலமாக, காப்பிக்காடு பகுதியை சேர்ந்த வினோ ரெக்ஸ் (48) என்பவர் டென்னிஸ் க்கு அறிமுகமாகியுள்ளார். அவர், டென்னிஸின் மகனுக்கு வெளிநாட்டில் வேலை வாங்கித்தருவதாக ஆசை வார்த்தை கூறியுள்ளார்.
இதனை நம்பிய டென்னிஸ் நேரடியாகவும்,வங்கி கணக்கு மூலமாக வினோ ரெக்ஸ் க்கு பல தவணைகளாக மொத்தம் 3 லட்சத்து 30 ஆயிரம் ரூபாயை கொடுத்துள்ளார் பணம் கொடுத்து பல மாதங்கள் ஆகியும் வினோ ரெக்ஸ் வேலை வாங்கி தரவில்லையாம். இதனால் தான் ஏமாற்றப்பட்டதை உணர்ந்த டென்னிஸ், தனது பணத்தை திருப்பி தருமாறு கேட்டுள்ளார். அதற்கு வினோரெக்ஸ் முறையான பதில் அளிக்காமல் இழுத்தடித்து வந்துள்ளார்.
இதையடுத்து டென்னிஸ் தென்தாமரை குளம் காவல் நிலையத்தில் புகார் அளித்தார். அதன் பேரில் போலீசார் வினோ ரெக்ஸ் மீது வழக்குப் பதிவு செய்து விசாரணை நடத்தி வருகின்றனர்
