மேட்டூர் அணையில் இருந்து தண்ணீர் திறப்பு!

சம்பா சாகுபடியை பாதுகாக்க நடவடிக்கை

சேலம், செப். 1:

சேலம் மேட்டூர் அணையில் இருந்து குடிநீர் மற்றும் காவிரி டெல்டா பாசனத்திற்காக தமிழக முதலமைச்சர் ஜோசப் விஜய் தண்ணீரை திறந்து வைத்தார். தென்மேற்கு பருவமழை பற்றாக்குறை மற்றும் எல் நினோ தாக்கத்தை கருத்தில் கொண்டு, குறைந்த அளவிலான நீரை சிக்கனமாக பயன்படுத்தி சம்பா சாகுபடியை பாதுகாக்கும் வகையில் தண்ணீர் திறக்கப்பட்டுள்ளது.

செப். 1 காலை நிலவரப்படி மேட்டூர் அணையின் நீர்மட்டம் 91.56 அடியாகவும், நீர் இருப்பு 54.45 டி.எம்.சி. ஆகவும் இருந்தது. அணைக்கு வினாடிக்கு 10,857 கனஅடி நீர் வந்து கொண்டிருந்தது. நீர் இருப்பு மற்றும் நீர்வரத்தை தொடர்ந்து கண்காணித்து, பாசன தேவைக்கேற்ப நீர் வெளியேற்றம் படிப்படியாக முறைப்படுத்தப்படும் என தெரிவிக்கப்பட்டுள்ளது.

மேட்டூர் அணையில் இருந்து திறக்கப்படும் ஒவ்வொரு கனஅடி நீரும் விவசாயிகளின் நலனுக்காக முறையாக பயன்படுத்தப்படுவதை உறுதி செய்ய அதிகாரிகளுக்கு அறிவுறுத்தப்பட்டுள்ளது. காவிரி ஆறு மற்றும் கால்வாய்களில் சட்டவிரோதமாக மின் மோட்டார்கள் மூலம் தண்ணீர் உறிஞ்சுதல், அனுமதியின்றி நீர் எடுத்தல் உள்ளிட்ட செயல்களை தடுக்க நீர்வளத்துறை, வருவாய்த்துறை, காவல்துறை மற்றும் மின்வாரிய அதிகாரிகள் அடங்கிய கூட்டு கண்காணிப்பு குழுக்கள் அமைக்கப்பட்டுள்ளன. இக்குழுக்கள் இரவு பகலாக ரோந்து பணியில் ஈடுபட உள்ளன.

காவிரி நீர் தமிழ்நாட்டின் சட்டப்பூர்வ உரிமை என்றும், நடுவர் மன்ற இறுதி தீர்ப்பு மற்றும் உச்சநீதிமன்ற தீர்ப்புகளின் அடிப்படையில் தமிழ்நாட்டிற்கு உரிய நீரை பெற அரசு தொடர்ந்து நடவடிக்கை எடுக்கும் என்றும் முதலமைச்சர் ஜோசப் விஜய் தெரிவித்தார்.

மேலும், நீரை சிக்கனமாக பயன்படுத்தி கடைமடை வரை முறையாக பகிர்ந்தளித்து சம்பா சாகுபடியை வெற்றிபெறச் செய்ய வேண்டும் என விவசாயிகளுக்கு முதலமைச்சர் வேண்டுகோள் விடுத்தார். குறைந்த நீர் தேவையுள்ள மத்திய கால நெல் ரகங்கள் மற்றும் நேரடி நெல் விதைப்பு போன்ற சாகுபடி முறைகளை பின்பற்றுமாறும் கேட்டுக்கொண்டார்.

நிகழ்ச்சியில் நீர்வளத்துறை அமைச்சர் ஆனந்த், போக்குவரத்துத்துறை அமைச்சர் விஜய் தமிழன் பார்த்திபன், சட்டமன்ற உறுப்பினர்கள் லட்சுமணன், சிவகுமார், பழனிவேல் உள்ளிட்டோர் கலந்து கொண்டனர்.