தென்காசி, அக். 5:
இயற்கை மற்றும் சுற்றுச்சூழல் பாதுகாப்பை வலியுறுத்தும் வகையில், குற்றாலம் ஸ்ரீ பராசக்தி மகளிர் கல்லூரி வளாகத்தில் ஒரு லட்சம் பனை விதைகள் நடும் பணி நடைபெற்றது. நாட்டு நலப்பணித் திட்டம் மற்றும் வனத்துறை சார்பில் நடைபெற்ற இந்நிகழ்வு, கல்லூரிக்கு தேசிய தர நிர்ணயக் குழுவின் மறுமதிப்பீட்டில் 4-வது சுற்றில் ‘A’ தகுதி கிடைத்துள்ளதையும் முன்னிட்டு நடத்தப்பட்டது.
நிகழ்விற்கு கல்லூரி முதல்வர் முனைவர் சு. மகாலட்சுமி தலைமை வகித்தார். கல்லூரி செயலர் செல்வி தி.சு. ரோசாலிசுபதா சிறப்பு பங்கேற்பு வழங்கினார். நாட்டு நலப்பணித் திட்ட உறுப்பினர்கள், பேராசிரியர்கள் மற்றும் மாணவியர்கள் கலந்து கொண்டு பனை விதைகளை ஆர்வத்துடன் நட்டனர்.
பனை மரங்களின் எண்ணிக்கையை அதிகரித்தல், இயற்கை வளங்களைப் பாதுகாத்தல், சுற்றுச்சூழல் சமநிலையைப் பேணுதல் மற்றும் மாணவியர்களிடையே சுற்றுச்சூழல் விழிப்புணர்வை ஏற்படுத்துதல் ஆகியவை இந்நிகழ்வின் முக்கிய நோக்கங்களாகும். விதைகளை நட்ட மாணவியர்கள், அவற்றை முறையாகப் பாதுகாப்பதற்கான உறுதிமொழியையும் எடுத்துக்கொண்டனர்.
சுற்றுச்சூழல் பாதுகாப்பின் முக்கியத்துவத்தை மாணவியர்களுக்கு உணர்த்தும் வகையில் நடைபெற்ற இந்நிகழ்வு, “எதிர்காலத்தை வளமாக்குவோம்” என்ற நோக்கத்தை வலியுறுத்தியது.
