சென்னை, மார்ச் 23 –
தமிழகம் முழுவதும், மண்டலம் மற்றும் தொகுதிவாரியாக அக்னி நியூஸ் சர்வீஸ் நிறுவனம் 2026 சட்டமன்ற தேர்தல் கருத்துக் கணிப்பை நடத்தியது. இதில் 18 முதல் 30 வயது வரை உள்ள ஆண்கள் 23,140, பெண்கள் 27, 665 பேரிடமும் 31 முதல் 75 வயது வரை உள்ள ஆண்கள் 23,407, பெண்கள் 26,898, பேரிடமும் மற்றும் மாற்றுப் பாலினத்தவர்கள் 533 பேர்கள் என 1,01,643 வாக்காளர்களையும் சந்தித்து கருத்து கணிப்பு நடத்தப்பட்டது.
இக்கருத்துக் கணிப்பு வெளியீட்டிற்கான செய்தியாளர்கள் சந்திப்பு சென்னை பத்திரிகையாளர் மன்றத்தில் நடைபெற்றது. அப்போது அக்னி நியூஸ் சர்வீஸ் நிறுவனத்தின் முதன்மை செயல் அலுவலர் சுரேஷ் தெரிவித்ததாவது: எங்கள் நிறுவன கருத்துக் கணிப்பில் மண்டலம் வாரியாக முறையே தென் மண்டலத்தில் 58 தொகுதிகளில் திமுக கூட்டணி 42, அதிமுக 16, மத்திய மண்டலத்தில் 37 தொகுதிகளில் திமுக 35, அதிமுக கூட்டணி 2, மேற்கு மண்டலத்தில் 50 தொகுதிகளில் திமுக கூட்டணி 32, அதிமுக 18, வடக்கு மண்டலத்தில் உள்ள 52 தொகுதிகளில் திமுக கூட்டணி 35, அதிமுக கூட்டணி 17, சென்னை மண்டலத்தில் உள்ள 37 தொகுதிகளில் திமுக கூட்டணி 36, அதிமுக கூட்டணி ஒன்றிலும் முன்னணியில் உள்ளது.
வெற்றி பெறும் எண்ணிக்கை அடிப்படையில் 234 தொகுதிகளில் திமுக கூட்டணி 180 தொகுதிகளிலும் அதிமுக கூட்டணி 54 தொகுதிகளிலும் வெற்றி வாய்ப்பில் உள்ளது. நாம் தமிழர், தவெக ஆகிய கட்சிகள் வெற்றிபெற வாய்ப்பில்லை. வாக்கு சதவீத கருத்துக்கணிப்பில் திமுக கூட்டணி 44.9%, அதிமுக கூட்டணி 38.5%, தவெக 9.7%, நாதக 4.8%, சுயேச்சைகள் மற்றவர்கள் 2.1% வாக்குகள் பெறுவார்கள் என்று தெரிவித்தார்.
