இந்தியாவில் பாஜகவை எதிர்த்து கேள்வி கேட்கும் ஒரே இயக்கம் திமுக: தஞ்சாவூரில் உதயநிதி ஸ்டாலின் பேச்சு

தஞ்சாவூர், ஏப்ரல் 6 –

இந்தியாவில் பாஜகவை எதிர்த்து கேள்வி கேட்கும் ஒரே இயக்கம் திமுக தான் என்று உதயநிதி ஸ்டாலின் பேசினார். தஞ்சாவூர் தொகுதி திமுக வேட்பாளர் சண். ராமநாதனை ஆதரித்து துணை முதலமைச்சர் உதய நிதி ஸ்டாலின் தஞ்சாவூர் பழைய பஸ் நிலையம் அண்ணா சிலை அருகே பிரச்சாரம் செய்தார்.

அப்போது அவர் பேசியதாவது: தஞ்சாவூர் மாவட்டம் எப்போதும் திமுக கோட்டை, இந்த ஒருங்கிணைந்த தஞ்சாவூர் மாவட்டம் தான் நமது தலைவர் கருணாநிதி கொடுத்த மாவட்டம். 1962ல் கருணாநிதி இந்த தஞ்சாவூர் மண்ணில் இருந்து தான் முதன் முதலாக வெற்றி பெற்றார். நானும் ஒரு டெல்டாகாரன் தான் என்று கருணாநிதி பெருமையாக சொல்வார். இன்றைக்கு அதே பெருமையோடு நானும் ஒரு டெல்டாகாரன் என்கின்ற உரிமையோடு உங்களை எல்லாம் சந்திக்க வந்திருக்கின்றேன்.

தஞ்சாவூர் தொகுதி வேட்பாளர் சண். ராமநாதன் கட்சிப் பணி, மக்கள் பணி எதுவாக இருந்தாலும், அது இரண்டிலும் சிறப்பாக செயல்படுத்தியவர். அவருடைய நிர்வாக திறமையால் தமிழ்நாடு அளவில் சிறந்த மாநகராட்சிக்கான முதல் இடத்திலும், இந்திய அளவில் 13 வது இடமும் தஞ்சை மாநகராட்சி பெற்றுக் கொடுத்தது. அவரை மிகப் பெரிய வாக்கு வித்தியாசத்தில் ஜெயிக்க வைக்க குறைந்தது 50 ஆயிரம் வாக்குகள் வித்தியாசத்தில் ஜெயிக்க வைக்க வேண்டும்.

அண்மையில் கல்லூரி மாணவ, மாணவிகள் 10 லட்சம் பேருக்கு இலவச மடிக்கணினி வழங்கப்பட்டது. இதை வைத்து அதிமுகவினர் ஒரு பொய் பிரச்சாரத்தை செய்கின்றனர். மடிக்கணினி வழங்கும் திட்டத்தை அதிமுக கொண்டு வந்ததாகவும் அதை நாம் முடக்கி விட்டதாகவும் கூறுகின்றனர். ஆனால் அதிமுக ஆட்சியில் மடிக்கணினி பள்ளியில் படிக்கும் மாணவர்களுக்கு தான் கொடுத்தனர்.

திட்டத்தை அதிமுக ஆட்சியில் இருக்கும் போது 2019 ஆம் ஆண்டில் கைவிட்டனர். கல்லூரி மாணவ மாணவிகளுக்கு மடிக்கணினி கொடுத்தால் வேலை தேடுவதற்கும், மேல் படிப்பு படிக்கும் போது பயன் தரும் என்பதால் பள்ளி மாணவர்களை விட கல்லூரி மாணவ, மாணவிகளுக்கு வழங்க முதல்வர் முடிவு செய்தார். இதன்படி கல்லூரியில் படிக்கும் 10 லட்சம் மாணவ மாணவிக்கு மடிக்கணினி வழங்கப்பட்டது.

இதே போல் பல்வேறு திட்டங்கள் திமுக அரசு நிறைவேற்றி உள்ளது. நாம் இவ்வளவு திட்டங்களை நிறைவேற்றி உள்ளோம். ஆனால் தமிழ்நாட்டுக்கு கேட்கிற நிதியை மத்திய அரசு தருவதில்லை. தமிழ்நாட்டை மத்திய அரசு புறக்கணித்து வருகிறது. அப்படிப்பட்ட பாஜகவை தமிழ்நாடு புறக்கணித்து காட்ட வேண்டும் என்றார் உதயநிதி ஸ்டாலின்.