தருமபுரி அக் : 08
தருமபுரி அருகே பிரசவ அறுவை சிகிச்சையின்போது தாய் உயிரிழந்த நிலையில், குழந்தை உயிருடன் மீட்கப்பட்ட சம்பவம் பரபரப்பை ஏற்படுத்தியுள்ளது.
பாப்பிரெட்டிபட்டி வட்டம் கடத்தூர் அடுத்த பீனாட்சிப்பட்டி கிராமத்தைச் சேர்ந்த ஆரோக்கிய சௌரிமுத்துவின் மனைவி விண்ணரசி, இரண்டாவது பிரசவத்திற்காக தருமபுரியில் உள்ள தனியார் மருத்துவமனையில் கடந்த 7-ஆம் தேதி அனுமதிக்கப்பட்டார். காலை 10 மணியளவில் அறுவை சிகிச்சை தொடங்கியதாக கூறப்படுகிறது.
ஆனால், மாலை வரை தாயையும் குழந்தையையும் உறவினர்களிடம் காண்பிக்காத நிலையில், விண்ணரசி உயிரிழந்துவிட்டதாக மருத்துவமனை தரப்பில் தெரிவிக்கப்பட்டதாக கூறப்படுகிறது. குழந்தை உயிருடன் மீட்கப்பட்டது.
இதனால் ஆத்திரமடைந்த 200-க்கும் மேற்பட்ட உறவினர்கள் மருத்துவமனை முன்பு முற்றுகை போராட்டத்தில் ஈடுபட்டனர். சம்பவ இடத்திற்கு வந்த போலீசார் மற்றும் வருவாய்த்துறை அதிகாரிகள் பேச்சுவார்த்தை நடத்தி விசாரணை மேற்கொண்டனர்.
சிகிச்சை குறித்து முழுமையான விளக்கம் அளிக்கப்படவில்லை என்றும், தாய் உயிரிழந்ததற்கான காரணத்தை உரிய முறையில் விசாரிக்க வேண்டும் என்றும் உறவினர்கள் வலியுறுத்தினர். சம்பவம் தொடர்பாக போலீசார் மற்றும் வருவாய்த்துறை அதிகாரிகள் தொடர்ந்து விசாரணை நடத்தி வருகின்றனர்.
