தருமபுரி, செப்.24: தருமபுரி மாவட்ட இந்திய ஐக்கிய கம்யூனிஸ்ட் கட்சியின் மாநில மாநாட்டு தீர்மானங்கள் குறித்து விளக்கப் பேரவைக் கூட்டம், மாவட்ட ஆட்சியர் அலுவலகம் அருகே உள்ள மின்னலக அரங்கில் நடைபெற்றது. மாவட்ட துணைச்செயலாளர் ஜி. மாதையன் தலைமையில் நடைபெற்ற கூட்டத்தில், மாநிலக்குழு உறுப்பினர்கள் பி. இரவி, ஈ. அலமேலு, ஜி. ராஜகோபால், என்.பி. ராஜி ஆகியோர் முன்னிலை வகித்தனர். மாநிலக்குழு உறுப்பினர் ஜி. பச்சாகவுண்டர் வரவேற்றார்.
கூட்டத்தில் இந்திய ஐக்கிய கம்யூனிஸ்ட் கட்சியின் மாநில செயலாளர் உ. கணேசன், மாநில தலைவர் வீர பாலன், மாநில பொருளாளரும் தருமபுரி மாவட்ட செயலாளருமான ஜெ. பிரதாபன், மாநில துணைச்செயலாளர்கள் எஸ். சுந்தரம், கே.எம். காளியப்பன் ஆகியோர் மாநில மாநாட்டில் நிறைவேற்றப்பட்ட தீர்மானங்கள் குறித்து விளக்க உரையாற்றினர். இதில் கட்சி நிர்வாகிகள் மற்றும் தொண்டர்கள் திரளாக கலந்து கொண்டனர்.
கூட்டத்தில் தருமபுரி மாவட்டத்தை வறட்சி பாதித்த மாவட்டமாக அறிவித்து விவசாயிகளின் சாகுபடி இழப்புகளுக்கு நிவாரணம் வழங்க வேண்டும், கனிமவள கொள்ளையை தடுத்து நிறுத்த வேண்டும், மகாத்மா காந்தி தேசிய ஊரக வேலை உறுதியளிப்பு சட்டத்தை முறையாக அமல்படுத்த வேண்டும் உள்ளிட்ட பல்வேறு தீர்மானங்கள் நிறைவேற்றப்பட்டன. இறுதியில் மாவட்ட நிர்வாகக்குழு உறுப்பினர் வெ. பை. மாதையன் நன்றியுரையாற்றினார்.
