தருமபுரி, செப்.19:
புரட்டாசி மாதத்தின் முதல் சனிக்கிழமையை முன்னிட்டு தருமபுரி மாவட்டத்தில் உள்ள பெருமாள் கோவில்களில் சிறப்பு வழிபாடுகள் நடைபெற்றன. இலக்கியம்பட்டியில் அமைந்துள்ள ஸ்ரீதேவி, பூதேவி சமேத நித்திய கல்யாண வெங்கடேஸ்வர பெருமாள் கோவிலில் அதிகாலை பெருமாளுக்கு சிறப்பு அபிஷேகம் மற்றும் ஆராதனைகள் நடைபெற்றன.
இதையடுத்து ஸ்ரீதேவி, பூதேவி சமேத நித்திய கல்யாண வெங்கடேஸ்வர பெருமாள் சிறப்பு அலங்காரத்தில் பக்தர்களுக்கு அருள்பாலித்தார். புரட்டாசி முதல் சனிக்கிழமையை முன்னிட்டு ஏராளமான பக்தர்கள் கோவிலுக்கு வந்து சுவாமி தரிசனம் செய்து வழிபட்டனர். பின்னர் கோவில் சார்பில் பக்தர்களுக்கு பிரசாதம் வழங்கப்பட்டது.
