வாணியம்பாடி, அக். 6:
திருப்பத்தூர் மாவட்டம் வாணியம்பாடி அருகே, ஆதார் கைரேகையை பயன்படுத்தி தனது வங்கி கணக்கில் இருந்து இரண்டு தவணைகளில் மொத்தம் ரூ.11,200 எடுக்கப்பட்டதாகவும், அந்தப் பணம் தனக்கு வழங்கப்படவில்லை என்றும் 100 நாள் வேலைத்திட்ட பெண் ஒருவர் மாவட்ட ஆட்சியரிடம் புகார் மனு அளித்துள்ளார்.
வாணியம்பாடி தாலுகா வள்ளிப்பட்டு கிராமம் குட்டக்கொல்லி பகுதியைச் சேர்ந்த செல்வி பொன்னுரங்கம் என்பவர் அளித்துள்ள மனுவில், கடந்த பிப்ரவரி 14-ஆம் தேதி 100 நாள் வேலை செய்ததற்கான ஊதியத்தை எடுப்பதற்காக வள்ளிப்பட்டு செந்தமிழ் இ-சேவை மையத்திற்கு சென்றதாக தெரிவித்துள்ளார். அங்கு இ-சேவை மையத்தை நடத்தி வரும் தமிழரசனிடம் ஆதார் கைரேகை மூலம் தனது வங்கி கணக்கில் இருந்து பணம் எடுத்துத் தருமாறு கேட்டதாகவும், கைரேகை வைத்த பின்னர் “பணம் வரவில்லை” என அவர் தெரிவித்ததாகவும் கூறியுள்ளார்.
ஆனால், பின்னர் வங்கி கணக்கை சரிபார்த்தபோது, அன்றைய தினமே தனது கணக்கில் இருந்து ரூ.9,100 எடுக்கப்பட்டிருந்தது தெரியவந்ததாக புகாரில் குறிப்பிட்டுள்ளார். இதேபோல், பிப்ரவரி 16-ஆம் தேதி மீண்டும் அதே இ-சேவை மையத்திற்கு சென்று கைரேகை வைத்து பணம் எடுக்க முயன்றபோதும், பணம் வரவில்லை என தெரிவித்து அனுப்பியதாக கூறியுள்ளார்.
இதையடுத்து வங்கிக்கு சென்று கணக்கு விவரங்களை சரிபார்த்தபோது, பிப்ரவரி 16-ஆம் தேதி மேலும் ரூ.2,100 எடுக்கப்பட்டிருப்பது தெரியவந்ததாக தெரிவித்துள்ளார். இதன் மூலம் இரண்டு தவணைகளில் தனது வங்கி கணக்கில் இருந்து ஆதார் கைரேகை வாயிலாக மொத்தம் ரூ.11,200 எடுக்கப்பட்டுள்ளதாக அவர் கூறியுள்ளார்.
இதுகுறித்து இ-சேவை மையத்தை நடத்தி வரும் தமிழரசனிடம் கேட்டபோது, தான் பணம் எடுக்கவில்லை என்றும், இந்த விவகாரத்திற்கும் தனக்கும் எந்த சம்பந்தமும் இல்லை என்றும் அவர் தெரிவித்ததாக செல்வி பொன்னுரங்கம் தனது புகார் மனுவில் குறிப்பிட்டுள்ளார்.
மேலும், இதேபோன்று அந்த இ-சேவை மையத்தில் மேலும் சிலரும் பாதிக்கப்பட்டுள்ளதாகவும் தனது புகாரில் தெரிவித்துள்ளார். எனவே, சம்பந்தப்பட்ட இ-சேவை மையம் மற்றும் அதன் செயல்பாடுகள் குறித்து உரிய விசாரணை நடத்தி, தனது வங்கி கணக்கில் இருந்து எடுக்கப்பட்ட ரூ.11,200-ஐ மீட்டுத் தர நடவடிக்கை எடுக்க வேண்டும் என மாவட்ட ஆட்சியரிடம் செல்வி பொன்னுரங்கம் கோரிக்கை விடுத்துள்ளார்.
