திண்டுக்கல், அக். 1:
மத்திய அரசு அறிவித்துள்ள யுபிஐ பணப் பரிவர்த்தனை கட்டணத்தை திரும்பப் பெற வலியுறுத்தி, திண்டுக்கல் வர்த்தக சங்கம் மற்றும் திண்டுக்கல் மாவட்ட தொழில் வர்த்தக சங்கம் சார்பில் கண்டன ஆர்ப்பாட்டம் நடைபெற்றது.
திண்டுக்கல் தலைமை தபால் நிலையம் முன்பு நடைபெற்ற இந்த ஆர்ப்பாட்டத்தில், யுபிஐ மூலம் மேற்கொள்ளப்படும் பணப் பரிவர்த்தனைகளுக்கு கட்டணம் விதிக்கும் நடவடிக்கையை திரும்பப் பெற வேண்டும் என வர்த்தகர்கள் வலியுறுத்தினர்.
மேலும், தங்களது கோரிக்கையை வலியுறுத்தி மத்திய நிதியமைச்சருக்கு கோரிக்கை மின்னஞ்சல் அனுப்பவும் ஏற்பாடு செய்யப்பட்டது. ஆர்ப்பாட்டத்தில் திண்டுக்கல் வர்த்தக சங்கம், திண்டுக்கல் மாவட்ட தொழில் வர்த்தக சங்கம் உள்ளிட்ட பல்வேறு வணிகர்கள் மற்றும் வணிக நிறுவனங்களின் பிரதிநிதிகள் கலந்து கொண்டு தங்களது எதிர்ப்பை பதிவு செய்தனர்.
