நாகர்கோவில், ஜூலை 28 –
கிள்ளியூர் வட்டத்திற்குட்பட்ட பகுதிகளில் மாவட்ட நீர்வளத்துறை மற்றும் பேரூராட்சிகளின் சார்பில் நடைபெற்றுவரும் வளர்ச்சித்திட்ட பணிகளை மாவட்ட ஆட்சித்தலைவர் மு.பிரதாப் இன்று நேரில் பார்வையிட்டு ஆய்வு மேற்கொண்டார்.
பின்னர் அவர் தெரிவிக்கையில்: கிள்ளியூர் தொகுதிக்குட்பட்ட கருங்கல் தேர்வு நிலை பேரூராட்சிக்குட்பட்ட பகுதியில் ரூ.5.22 கோடி மதிப்பில் புதிதாக அமைக்கப்பட்டுவரும் பேருந்து நிலையம் மேம்பாடு செய்ய நிதி ஒதுக்கீடு செய்யப்பட்டு பணிகள் நடைபெற்று வருகிறது. அதனடிப்படையில் கருங்கல் பேருந்து நிலைய கட்டுமான பணிகளை நேரில் பார்வையிட்டு ஆய்வு மேற்கொள்ளப்பட்டது.
தற்போது இப்பேருந்து நிலையத்தில் முதல் தளத்தில் தரை ஓடுகள் பதிக்கும் பணி, குழாய்கள் அமைக்கும் பணி, மற்றும் மின்சார பணிகள் நடைபெற்று வருகிறது. இரண்டாவது தளத்தில் கட்டுமான பணிகள் மற்றும் பூச்சு வேலைகள் நிறைவடைந்துள்ளது. மேலும் பயணிகள் காத்திருக்கும் பகுதியில் தூண்கள் அமைக்கும் பணி நிறைவடைந்துள்ளது. கழிப்பறைகளை பிற இடங்களில் கட்டுமாறும் பயணிகளின் வசதிக்கேற்ப பேருந்து நிலையத்தினை கட்டமைக்குமாறும் உதவி இயக்குநர் பேரூராட்சிகள், செயல் அலுவலர், பொறியாளர்கள் மற்றும் ஒப்பந்ததாருக்கு அறிவுறுத்தப்பட்டது.
இப்பணிகள் மேற்கொள்வதன் மூலம் அருகாமையில் உள்ள பேரூராட்சிகள், ஊராட்சி பகுதிகளில் உள்ள சுமார் 7000 மக்கள் தினசரி பயன்பெறுவார்கள். எனவே இப்பணிகளை துரிதமாக மேற்கொள்வதோடு, கட்டுமான பணிகள் தரமானதாகவும், உறுதி தன்மையினை உறுதி செய்திட துறை சார்ந்த அலுவலர்களுக்கு அறிவுறுத்தப்பட்டது. மேலும் பணிகளை விரைந்து முடித்து பொதுமக்களின் பயன்பாட்டிற்கு கொண்டு வர அறிவுறுத்தப்பட்டது.
தொடர்ந்து ரூ.6.5 கோடி மதிப்பில் கருங்கல் கிளை கால்வாய் மற்றும் அதன்சார்பு வழங்கு வாய்க்கால்களை புனரமைப்பு பணிகள் மேற்கொள்ளப்பட்டு வருகிறது. தற்போது சிமெண்ட் கான்கிரீட் லைனிங், பூச்சு வேலைகள், தடுப்பு சுவர் அமைக்கும் பணிகள் உள்ளிட்ட பணிகள் நிறைவடைந்துள்ளது. மீதமுள்ள பணிகளை விரைந்து முடித்து பொதுமக்களின் பயன்பாட்டிற்கு கொண்டு வர சம்பந்தப்பட்ட துறை அலுவலர்களுக்கு அறிவுறுத்தப்பட்டது. இவ்வாறு மாவட்ட ஆட்சித்தலைவர் கூறினார்.
நடைபெற்ற ஆய்வுகளில் நீர் வளத்துறை செயற்பொறியாளர் வசந்தி, கிள்ளியூர் வட்டாட்டசியர் ராஜசேகர், கருங்கல் தேர்வுநிலை பேருராட்சி செயல் அலுவலர் சத்யதாஸ், செயற்பொறியாளர், துறை அலுவலர்கள், பணியாளர்கள், பொதுமக்கள், உள்ளாட்சி பிரதிநிதிகள் உட்பட கலந்து கொண்டனர்.
