ஈரோடு, செப். 28:
இசைஞானி இளையராஜாவின் 50 ஆண்டுகால இசைப்பயணத்தை கொண்டாடும் வகையில், ஈரோடு டெக்ஸ்வேலியில் வரும் அக்டோபர் 25-ம் தேதி பிரம்மாண்டமான நேரடி இன்னிசை நிகழ்ச்சி நடைபெற உள்ளது.
அருண் கிரியேசன்ஸ் மற்றும் மெர்குரி நிறுவனங்கள் சார்பில் நடைபெறும் இந்த நிகழ்ச்சியில் தொழிலதிபர்கள், பல்வேறு நிறுவனங்களின் நிர்வாகிகள் மற்றும் முக்கிய பிரமுகர்கள் பங்கேற்க உள்ளனர். நிகழ்ச்சிக்கான முதல் டிக்கெட்டை இசைஞானி இளையராஜா சென்னையில் வெளியிட்டார். முதல் டிக்கெட்டை மில்கி மிஸ்ட் நிறுவன நிர்வாக இயக்குநர் சதீஷ்குமார் பெற்றுக்கொண்டார். நிகழ்ச்சியில் அருண் கிரியேசன்ஸ் நிர்வாக இயக்குநர் அருண் உள்ளிட்டோர் கலந்து கொண்டனர்.
டெக்ஸ்வேலியில் நவீன தொழில்நுட்பத்துடன் கூடிய பிரம்மாண்ட மேடை மற்றும் சிறப்பு காட்சியமைப்புகளுடன், இசை ரசிகர்களுக்கு மறக்க முடியாத அனுபவத்தை வழங்கும் வகையில் நிகழ்ச்சி ஏற்பாடு செய்யப்பட்டுள்ளது.
இந்நிகழ்ச்சிக்கான இணையவழி நுழைவுச்சீட்டு விற்பனை தற்போது entrypasses.com இணையதளத்தில் நடைபெற்று வருகிறது. டிக்கெட் விலை ரூ.500 முதல் ரூ.50,000 வரை நிர்ணயிக்கப்பட்டுள்ளது.
