தூத்துக்குடி மாநகராட்சி கூட்டத்தில் 2025 – 26 ஆம் ஆண்டின் உத்தேச வரவு – செலவு அறிக்கை தாக்கல் செய்யப்பட்டது.
தூத்துக்குடி மாநகராட்சி கூட்டம் மேயர் ஜெகன் பெரியசாமி தலைமையில், மாநகராட்சி ஆணையர் மதுபாலன், துணை மேயர் ஜெனிட்டா முன்னிலையில் நடந்தது. இக்கூட்டத்தில் தூத்துக்குடி மாநகராட்சி 2025-2026 ஆம் ஆண்டின் உத்தேச வரவு செலவு அறிக்கை மற்றும் 2024-2025 ஆண்டின் திருத்திய வரவு செலவு அறிக்கை தாக்கல் செய்யப்பட்டது.
இதன் விபரம் வருமாறு : கடந்த ஆண்டின் 2024-2025 வரவு செலவு அறிக்கையை இம்மாமன்றம் அங்கீகரித்ததின் பேரில் 2024-2025 ஆண்டிற்கான வரவினங்களும் செலவினங்களும் திருத்திய மதிப்பீடு இறுதி செய்யப்பட்டது. நடப்பு ஆண்டிற்காக 2025-2026 வருவாய் நிதியில் ரூ.294.59 இலட்சம் உபரியாக வருமானம் ஏற்படும் எனவும், குடிநீர் மற்றும் வடிகால் நிதியில் ரூ. 233.23 இலட்சம் உபரியாக வருமானம் வரும் எனவும், கல்வி நிதியில் ரூ 217.47 இலட்சம் உபரியாக வருமானம் ஏற்படும் எனவும் உத்தேசமாக கணக்கிடப்பட்டுள்ளது.
1) வருவாய் நிதி : இதில் நடப்பு ஆண்டில் (2025-2026) சொத்துவரி, இதர வரி மற்றும் வரியில்லா இனங்கள் மூலமாக ரூ. 4529.50 இலட்சம், முத்திரை கட்டணம் மற்றும் கேளிக்கை வரியாக ரூ.575.00 இலட்சம், அரசு மானியம் மற்றும் மாநில பகிர்மான நிதியாக ரூ.6860.00 இலட்சம், 15 வது நிதி குழு மானியமாக ரூ.1500.00 இலட்சம் மற்றும் ஏனைய வருமானங்கள் மூலம் ரூ.3661.59 இலட்சம் என ஆக மொத்தம் ரூ.17126.09 இலட்சம் வருமானம் வரும் என எதிர்பார்க்கப்படுகிறது.
இதில் நடப்பு ஆண்டிற்காக (2025-2026) சம்பளம் , ஒய்வூதியம் மற்றும் ஓய்வூதியர்கள் தொடர்பான செலவினங்களுக்கு ரூ. 7817.00 இலட்சம் நிர்வாக செலவினங்களுக்கு ரூ.729.50 இலட்சம், சாலை, கட்டிடங்கள் மற்றும் இதர பராமரிப்பு, இயக்க செலவினங்களுக்காக ரூ.6804.00 இலட்சம், நிதி மற்றும் மற்றும் திட்டமிட்ட செலவினங்களுக்காக ரூ.181.00 இலட்சம், பொது நிதி பங்களிப்புக்காக ரூ.1300.00 இலட்சம் என ஆக மொத்தம் ரூ.16831.50 இலட்சம் செலவாகும் என உத்தேசமாக கணக்கிடப்பட்டுள்ளது. இதில் ரூ.294.59 இலட்சம் உபரியாக வருமானம் வரும் என எதிர்பார்க்கப்படுகிறது.
2) குடிநீர் மற்றும் வடிகால் நிதி : நடப்பு ஆண்டில் (2025-2026) குடிநீர் வரியாக ரூ.2130.50 இலட்சமும் பயன்பாட்டு கட்டணமாக ரூ.4202.38 இலட்சமும் இதர வருமானமாகவும் ரூ. 200.00 இலட்சம் என ஆக மொத்த ரூ.6532.88 இலட்சம் வருமானமாக பெறப்படும் என எதிர்பார்க்கப்படுகிறது.
இதில் சம்பளம் மற்றும் ஓய்வூதியர் செலவினங்களுக்கு ரூ.695.35 இலட்சம் குடிநீர் பணி இயக்கம் மற்றும் பராமரிப்பு செலவினத்திற்காக ரூ.1910.00 இலட்சமும், நிர்வாக மற்றும் இதர செலவினங்களுக்காக (பொதுநிதி பங்களிப்பு) ரூ.2094.30 இலட்சமும், நிதி செலவினங்களுக்காக ரூ.1600.00 இலட்சமும் என ஆக மொத்தம் ரூ.6299.65 இலட்சமும் செலவாகலாம் என மதிப்பீடப்பட்டுள்ளது. இதில் உபரியாக ரூ.233.23 இலட்சம் வரும் என எதிர்பார்க்கப்படுகிறது.
3) ஆரம்ப கல்வி நிதி : நடப்பு ஆண்டில் (2025-2026) கல்வி வரியாக ரூ. 783.47 இலட்சமும் மற்றும் இதர வருமானமாக ரூ. 27.00 இலட்சம் என ஆக மொத்தம் ரூ.810.47 இலட்சம் வருமானம் கிடைக்கும் என எதிர்பார்க்கப்படுகிறது. இதில் பழுதுபார்ப்பு மற்றும் பராமரிப்பு செலவினங்களுக்கு ரூ.147.00 இலட்சமும், நிர்வாக மற்றும் இதர செலவினங்களுக்கு ரூ.446.00 இலட்சம் 61601 ஆக மொத்தம் ரூ.593.00 இலட்சம் செலவாகும் என தோராயமாக மதிப்பிடப்பட்டுள்ளது. இதில் உபரியாக ரூ. 217.47 இலட்சம் இருக்கும் என எதிர்பார்க்கப்படுகிறது.
இக்கூட்டத்தில் துணை ஆணையர் சரவணகுமார், மாநகர துணை பொறியாளர் சரவணன், துணை ஆணையாளர்கள் உதவி பொறியாளர்கள் மாநகராட்சி மண்டல தலைவர்கள், கவுன்சிலர்கள் கலந்து கொண்டனர்.
