சென்னை, நவ. 06,
முரசு புயலின்போது ஆந்திர கடல் பகுதியில் படகு கவிழ்ந்து விபத்துக்குள்ளானதில், சென்னை காசிமேட்டைச் சேர்ந்த 9 மீனவர்கள் மாயமாகினர். கடந்த அக்டோபர் 29-ம் தேதி மீன்பிடிக்கச் சென்ற அவர்கள், ஆந்திர கடல் பகுதியில் மீன்பிடித்துக் கொண்டிருந்தபோது புயல் எச்சரிக்கை காரணமாக ராமயபட்டினம் கடற்கரையில் படகை நிறுத்தியுள்ளனர். பின்னர் மீண்டும் கடலுக்குச் சென்றபோது படகின் இயந்திரத்தில் பழுது ஏற்பட்டுள்ளது. இதையடுத்து, கடந்த 3-ம் தேதி அதிகாலை மற்றொரு படகுக்கு வயர்லெஸ் மூலம் தகவல் தெரிவித்துள்ளனர். அதன்பிறகு 9 மீனவர்களையும் தொடர்புகொள்ள முடியவில்லை.
இதையடுத்து, கடலோரக் காவல் படையினர் கப்பல்கள் மற்றும் ஹெலிகாப்டர்கள் மூலம் தேடுதல் பணியில் ஈடுபட்டனர். இந்நிலையில், ஆந்திர மாநிலம் பிரகாசம் மாவட்டம் கொத்தபட்டினம் அருகே 5 மீனவர்களின் உடல்கள் கரை ஒதுங்கின. அவர்களில் விஜயகாந்த், மோகன், முருகன் ஆகிய 3 பேரின் உடல்கள் அடையாளம் காணப்பட்டுள்ளன. மற்ற 2 பேரின் உடல்களை அடையாளம் காண தமிழக மீன்வளத்துறை அதிகாரிகள் ஆந்திரா சென்றுள்ளனர். மேலும், மாயமான எஞ்சிய 4 மீனவர்களைத் தேடும் பணி தொடர்ந்து நடைபெற்று வருகிறது.
இதற்கிடையே, மாயமான மீனவர்களின் குடும்பத்தினர் காசிமேடு பகுதியில் சாலை மறியலில் ஈடுபட்டனர். அவர்களை நேரில் சந்தித்த அமைச்சர் மரிய வில்சன் ஆறுதல் தெரிவித்தார். படகு உரிமையாளர் பாதுகாப்பு விதிமுறைகளைப் பின்பற்றாதது குறித்து விசாரணை நடத்த உத்தரவிடப்பட்டுள்ளதாகவும் தெரிவித்தார்.
முதல்வர் விஜய் நிவாரணம் அறிவிப்பு:
இந்தச் சம்பவம் குறித்து இரங்கல் தெரிவித்துள்ள முதல்வர் சி. ஜோசப் விஜய், உயிரிழந்த மீனவர்களின் குடும்பங்களுக்கு தலா ரூ.7 லட்சம் நிவாரண நிதி வழங்க உத்தரவிட்டுள்ளார். இதில் ரூ.2 லட்சம் உடனடியாக வழங்கப்படும் என்றும், உயிரிழந்த மீனவர்களின் உடல்களை அரசு செலவில் தமிழகம் கொண்டு வந்து குடும்பத்தினரிடம் ஒப்படைக்க நடவடிக்கை எடுக்கப்படும் என்றும் தெரிவித்துள்ளார்.
