முட்டம் சுற்றுலாத்தலத்தில் கலெக்டர் ஆய்வு

அடிப்படை வசதிகளை மேம்படுத்த அறிவுறுத்தல்

நாகர்கோவில், அக்.7:

கன்னியாகுமரி மாவட்டம் முட்டம் சுற்றுலாத்தலத்தில் மேற்கொள்ளப்பட்டு வரும் பராமரிப்பு மற்றும் அடிப்படை வசதிகளை மாவட்ட கலெக்டர் மு.பிரதாப் நேரில் பார்வையிட்டு ஆய்வு செய்தார்.

குமரி மாவட்டத்தில் உள்ள இயற்கை எழில் மிகுந்த சுற்றுலாத்தலங்களுக்கு உள்நாடு மற்றும் வெளிநாடுகளில் இருந்து ஏராளமான சுற்றுலாப் பயணிகள் வருகை தருகின்றனர். முட்டம் சுற்றுலாத்தலத்திலும் ஆண்டுதோறும் பல்லாயிரக்கணக்கானோர் வந்து செல்கின்றனர். அவர்களின் வசதிக்காக கழிப்பறைகள், சிறுவர் பூங்கா, வாகன நிறுத்துமிடம், நுழைவுச்சீட்டு மையம், நடைபாதை மற்றும் மின்விளக்கு வசதிகள் ஏற்படுத்தப்பட்டுள்ளன.

ஆய்வின்போது பூங்காவில் பழுதடைந்துள்ள விளையாட்டு உபகரணங்களை உடனடியாக சீரமைக்கவும், தினசரி குப்பைகளை அகற்றி கழிப்பறைகளை சுகாதாரமாக பராமரிக்கவும் அலுவலர்களுக்கு கலெக்டர் அறிவுறுத்தினார். மேலும், சுற்றுலா மையத்தில் உள்ள உணவகங்களை ஆய்வு செய்து, பயணிகளுக்கு சுகாதாரமான மற்றும் தரமான உணவுகளை வழங்க அறிவுறுத்தியதுடன், விற்பனைக்கு வைக்கப்பட்டிருந்த குளிர்பானங்களின் காலாவதி தேதியையும் ஆய்வு செய்தார்.

சுற்றுலாப் பயணிகளுக்கு உரிய பாதுகாப்பு வழங்குவதுடன், சுற்றுலாத்தலம் தொடர்பான வழிகாட்டுதல்களை வழங்கவும் பணியாளர்களுக்கு கலெக்டர் அறிவுறுத்தினார்.