முன்னாள் மாணவியர் கல்லூரி நினைவுகளைப் பகிர்ந்து மகிழ்ச்சி
நா.ம.ச. சேர்மத்தாய் வாசன் மகளிர் கல்லூரியில் முன்னாள் மாணவியர் சந்திப்பு நிகழ்ச்சி சிறப்பாக நடைபெற்றது. இதில் கல்லூரியின் முன்னாள் மாணவியர்கள் ஒன்றிணைந்து தங்களது கல்லூரி நாட்களின் நினைவுகளைப் பகிர்ந்து மகிழ்ந்தனர். நிகழ்ச்சி பிரார்த்தனைப் பாடலுடன் தொடங்கியது.
சிறப்பு விருந்தினர்களாக முன்னாள் மாணவியர் திருமதி காமேஸ்வரி, தொழில்முனைவோர் மற்றும் நிறுவனத்தின் துணைத்தலைவர், தூத்துக்குடி மாவட்ட காவல் உதவி ஆய்வாளர் திருமதி எஸ்.கெளசல்யா, பரமக்குடி ஆங்கிலப் பாட உதவி ஆசிரியர் திருமதி சி.சண்முகப்பிரியா ஆகியோர் கலந்து கொண்டு குத்துவிளக்கேற்றினர்.
வணிகவியல் துறை உதவிப் பேராசிரியர் திருமதி ஜெயலட்சுமி வரவேற்புரையாற்றினார். தொடர்ந்து கல்லூரி முதல்வர் திருமதி எம்.கவிதா தலைமை உரையாற்றினார். முன்னாள் மாணவியர்களின் முக்கியத்துவம் குறித்தும், கல்லூரி நிறுவனத்திற்கும் முன்னாள் மாணவியர்களுக்கும் இடையே வலுவான மற்றும் நீடித்த உறவைப் பேணுவதன் அவசியம் குறித்தும் அவர் பேசினார்.
கல்லூரி செயலாளர் மற்றும் தாளாளர் திரு. V.K.V. பாலகுரு, சரஸ்வதி கோபாலகிருஷ்ணன் பள்ளியின் தலைவர் திரு. சி.முருகேசன் ஆகியோர் தங்களது கருத்துகளைப் பகிர்ந்து கொண்டனர்.
முதன்மை விருந்தினர்கள் மற்றும் கல்லூரி முதல்வர் திருமதி எம்.கவிதா இணைந்து, கல்லூரிக்கும் சமூகத்திற்கும் சிறப்பான பங்களிப்பை வழங்கிய முன்னாள் மாணவியர்களை பாராட்டி பதக்கங்கள் வழங்கி கௌரவித்தனர். இதையடுத்து நிகழ்ச்சி இனிதே நிறைவுற்றது.
