திருப்பூர் | செப். 23: இயற்கை விவசாயத்திற்கு விவசாயிகள் முக்கியத்துவம் அளிக்க வேண்டும் என்றும், ரசாயன உரங்கள் மற்றும் பூச்சிக்கொல்லிகளை தவிர்த்து இயற்கை முறையில் விளைவிக்கப்படும் விவசாயப் பொருட்கள் பொதுமக்களை சென்றடைய வேண்டும் என்றும் அனைத்திந்திய விவசாய சங்கம் மற்றும் தொழிலாளர் சங்கத்தின் திருப்பூர் மாவட்ட தலைவர் விவசாய மணி (எ) சுப்பிரமணி வலியுறுத்தினார்.
இயற்கை உரங்களான மாட்டுச்சாணம், மண்புழு உரம், பண்ணைக் கழிவுகள், ஜீவாமிர்தம், பஞ்சகவ்யா உள்ளிட்டவற்றை பயன்படுத்துவதுடன், வேப்பெண்ணெய் போன்ற இயற்கை பூச்சிக்கொல்லிகளையும், பாரம்பரிய நெல் மற்றும் தானிய விதைகளையும் பயன்படுத்த வேண்டும் என அவர் தெரிவித்தார். கருப்பு கவுனி, மாப்பிள்ளை சம்பா உள்ளிட்ட பாரம்பரிய அரிசி வகைகள், இயற்கை முறையில் விளைவிக்கப்பட்ட காய்கறிகள், பழங்கள், தானியங்கள், பருப்பு வகைகள் மற்றும் செக்கில் ஆட்டிய எண்ணெய் போன்றவற்றை மக்கள் பயன்படுத்த வேண்டும் என்றும் கூறினார்.
இயற்கை விவசாயத்தின் மூலம் தற்சார்பு வாழ்க்கை முறையை உருவாக்குவதுடன், இயற்கை விவசாய இடுபொருட்களை விவசாயிகளே தயாரிக்கும் முறைகள் குறித்தும் விழிப்புணர்வு ஏற்படுத்த வேண்டும் என அவர் குறிப்பிட்டார். இந்த கருத்துகள் மாவட்டம் மட்டுமின்றி தமிழகம் மற்றும் நாடு முழுவதும் பொதுமக்களை சென்றடைய வேண்டும் என்ற நோக்கில் ஜெய் ஸ்ரீ ராம் கல்லூரி மாணவர்களிடம் அவர் பேட்டியளித்தார்.
