வேலூர், அக். 13:
வேலூர் மாவட்டம், வேலூர் அண்ணா கலையரங்கம் அருகே, மணிப்பூர் காங்கிரஸ் நாடாளுமன்ற உறுப்பினர் அங்கோம்சா பிமோல் அகோய்ஜம் மாணவிகளிடம் பாலியல் அத்துமீறலில் ஈடுபட்டதாகக் கூறப்படும் குற்றச்சாட்டைக் கண்டித்து, வேலூர் மாவட்ட பாரதிய ஜனதா கட்சி சார்பில் கண்டன ஆர்ப்பாட்டம் நடைபெற்றது.
இந்த ஆர்ப்பாட்டத்திற்கு மாவட்டத் தலைவர் தசரதன் தலைமை தாங்கினார். மாவட்ட துணைத் தலைவர் சக்கரவர்த்தி, மாவட்டச் செயலாளர் மற்றும் வழக்கறிஞர் நாகராஜன் ஆகியோர் முன்னிலை வகித்தனர்.
ஆர்ப்பாட்டத்தில் பங்கேற்ற பாஜக நிர்வாகிகள் மற்றும் மகளிர் அணியினர், கட்சிக் கொடிகள் மற்றும் பதாகைகளை ஏந்தி, தங்களது கண்டன முழக்கங்களை எழுப்பினர்.
இந்த நிகழ்வில் மாவட்ட நிர்வாகிகள், கட்சி உறுப்பினர்கள், மகளிர் அணியினர் என 50-க்கும் மேற்பட்டோர் கலந்து கொண்டு ஆர்ப்பாட்டத்தில் ஈடுபட்டனர்.
