கலெக்டர் மு.பிரதாப் நேரில் ஆய்வு
நாகர்கோவில், அக்.7:
நாகர்கோவில் மாநகராட்சிக்குட்பட்ட அண்ணா விளையாட்டரங்கில் ரூ.1.93 கோடி மதிப்பில் நடைபெற்று வரும் நவீனமயமாக்கல் மற்றும் வளர்ச்சிப் பணிகளை மாவட்ட கலெக்டர் மு.பிரதாப் நேரில் ஆய்வு செய்தார்.
அண்ணா விளையாட்டரங்கில் விளையாட்டு வீரர், வீராங்கனைகளுக்கான வசதிகளை மேம்படுத்தும் வகையில் பார்வையாளர் கேலரி, முகப்பு தோற்றம், நீச்சல் குளம், வீராங்கனைகள் தங்கும் விடுதி, அத்லெடிக்ஸ் மற்றும் பளுதூக்கும் பயிற்சி கூடங்கள், உடற்பயிற்சிக்கூடம், கூடைப்பந்து மைதானம் உள்ளிட்டவை புதுப்பிக்கப்பட்டு வருகின்றன. மேலும், சுத்திகரிக்கப்பட்ட குடிநீர் வசதியும் ஏற்படுத்தப்பட்டு வருகிறது.
ஆய்வின்போது, விளையாட்டரங்கின் முன்புறம் உள்ள மழைநீர் வடிகால்களை சீரமைத்து, தண்ணீர் தேங்காத வகையில் பராமரிப்பு பணிகளை மேற்கொள்ளவும், வாகன நிறுத்துமிடத்தைச் சுற்றி சங்கிலித் தொடர் வேலி அமைக்கவும் கலெக்டர் அறிவுறுத்தினார். மேலும், மாநகராட்சி கட்டிடத்தின் முன்புறம் உள்ள பேவர் பிளாக்குகளை அகற்றி வடிகாலின் உயரத்தை அதிகரிக்கவும், ஸ்டேடியம் முன்புறம் உள்ள ஆக்கிரமிப்புகளை அகற்றவும் மாநகராட்சி அலுவலர்களுக்கு உத்தரவிட்டார்.
ஆய்வின்போது மாவட்ட விளையாட்டு அலுவலர் வினு, உதவி செயற்பொறியாளர் வாலி, இளநிலைப் பொறியாளர் ஸ்டீபன், மாநகராட்சி உதவி பொறியாளர் தேவி உள்ளிட்ட துறை அலுவலர்கள் மற்றும் பணியாளர்கள் உடனிருந்தனர்.
