ஈரோடு, செப். 7:
ஈரோடு மாவட்டம் பழையபாளையத்தில் உள்ள எபிக் அகாடமியில், ஷோபுகாய் சிட்டோரியோ கராத்தே அமைப்பு சார்பில் கலர் பெல்ட் தேர்வு சிறப்பாக நடைபெற்றது. மாணவர்களின் கராத்தே திறன், தற்காப்புத் திறன் மற்றும் பயிற்சியின் முன்னேற்றத்தை மதிப்பிடும் வகையில் நடைபெற்ற இத்தேர்வில் 50-க்கும் மேற்பட்ட மாணவ, மாணவிகள் ஆர்வத்துடன் பங்கேற்றனர்.
ஷோபுகாய் சிட்டோரியோ தலைவர் ஹன்சி அல்தாப் ஆலம் (TSKA செயலாளர்) வழிகாட்டுதலின்படி தேர்வு நடைபெற்றது. நிகழ்ச்சியில் ஷோபுகாய் சேலஞ்சர்ஸ் கராத்தே கிளப் (EDSKA) செயலாளர் ஷிகான் குமார், ஈரோடு மாவட்ட துணைத் தலைவர் ஷிகான் தனபால், சென்சாய் மகா முனியப்பன், சென்சாய் ஹரிராம், மாவட்ட இணைச் செயலாளர் சென்சாய் லட்சுமி உள்ளிட்டோர் முன்னிலை வகித்து தேர்வை நெறிப்படுத்தினர்.
கராத்தே போன்ற தற்காப்புக் கலைகள் மாணவர்களிடையே சுய ஒழுக்கம், தன்னம்பிக்கை, மன ஒருமைப்பாடு மற்றும் உடல் வலிமையை வளர்க்க உதவுகின்றன. குறிப்பாக குழந்தைகள் மற்றும் பெண்களுக்கு தற்காப்பு உணர்வை ஏற்படுத்துவதிலும் இக்கலை முக்கிய பங்கு வகிக்கிறது.
தேர்வில் சிறப்பாக செயல்பட்டு தேர்ச்சி பெற்ற மாணவ, மாணவிகளுக்கு பெல்ட்கள் மற்றும் சான்றிதழ்கள் வழங்கி கௌரவிக்கப்பட்டது. வெற்றி பெற்ற மாணவர்களுக்கு பயிற்சியாளர்கள், நிர்வாகிகள் மற்றும் பெற்றோர் வாழ்த்துகளையும் பாராட்டுகளையும் தெரிவித்தனர்.
