ஈரோடு, 15.08.2026
ஈரோட்டில் புகழ்பெற்ற ஸ்ரீ கோட்டை பத்ரகாளி அம்மன் திருக்கோவிலில் கோவில் கமிட்டி சார்பாக ஆடி மாதம் முழுவதும் பல்வேறு சிறப்பு வழிபாடுகளும் ஆன்மீக நிகழ்ச்சிகளும் வெகுவிமரிசையாக நடத்தப்பட்டு வருகின்றன.
இதன் தொடர்ச்சியாக, ஆடி மாதத்தின் மிக முக்கிய நாளான கடைசி ஆடி வெள்ளிக்கிழமை அன்று கோவில் வளாகத்தில் பிரம்மாண்ட விளக்கு பூஜை சிறப்புற நடைபெற்றது.
இச்சிறப்பு விளக்கு பூஜையில் 550-க்கும் மேற்பட்ட பெண்கள் கலந்துகொண்டு, விளக்கேற்றி அம்மனை மனமுருகி வழிபட்டனர்.
பூஜை நடைபெற்ற நேரத்தில் மழை பெய்தபோதிலும், அதனை சிறிதும் பொருட்படுத்தாமல் திரளான பெண்கள் வருகை தந்து தீவிர பக்தியுடன் பூஜையில் பங்கேற்றது அப்பகுதி மக்களிடையே பெரும் நெகிழ்ச்சியையும் பேசுபொருளையும் ஏற்படுத்தியது.
இக்கோவிலில் நடைபெறும் இந்த விளக்கு பூஜையில் தொடர்ந்து பங்கேற்று அம்மனை வழிபடுவதால் தங்களது நியாயமான வேண்டுதல்கள் அனைத்தும் உடனடியாகப் பலிக்கின்றது என்ற ஆழமான நம்பிக்கையின் காரணமாக, பெண்கள் ஆண்டுதோறும் தவறாமல் இதில் கலந்துகொள்கின்றனர்.
இதனால், ஒவ்வொரு ஆண்டும் இச்சிறப்பு பூஜையில் பங்கேற்கும் பெண்களின் எண்ணிக்கை தொடர்ந்து அதிகரித்துக்கொண்டே வருவது குறிப்பிடத்தக்கது.
திடீரென மழை பெய்தாலும் பக்தர்களுக்கு எவ்வித இடையூறும் ஏற்படாத வண்ணம், முன்னெச்சரிக்கை நடவடிக்கையாக அருகில் உள்ள மண்டபம் மற்றும் கோவில் வளாகத்தில் பிரம்மாண்ட பந்தல்கள் அமைத்து சிறப்பான வசதிகளை கோவில் கமிட்டியினர் செய்திருந்தனர். நிகழ்வின் நிறைவாக, இந்த ஆன்மீகச் சிறப்பு பூஜையில் கலந்து கொண்ட அனைத்துப் பெண்களுக்கும் கோவில் கமிட்டி சார்பாக கோட்டை ஸ்ரீ பத்திரகாளியம்மனின் பிரம்மாண்டமான திருவுருவப் படம் ஆசி வழங்கி நினைவளிப்பாக வழங்கப்பட்டது.
