திருப்பூர், செப் 26
திருப்பூரில் அரசியல் பழிவாங்கும் நோக்கத்துடன் தன் மீது பொய் வழக்குகள் பதிவு செய்யப்பட்டு வருவதாக குற்றம்சாட்டி, லட்சிய ஜனநாயக கட்சியின் திருப்பூர் தெற்கு மாவட்ட செயலாளர் இரா. செந்தில்குமார், மாநகர காவல் ஆணையரிடம் மனு அளித்துள்ளார். தனது உயிருக்கும் உடைமைகளுக்கும் பாதுகாப்பு வழங்க வேண்டும் என்றும் அவர் காவல்துறையிடம் கோரிக்கை விடுத்துள்ளார்.
காவல் ஆணையரிடம் அளித்துள்ள மனுவில், கடந்த 12 ஆண்டுகளுக்கும் மேலாக தென்னாடு மக்கள் கட்சியில் மாநில பொதுச் செயலாளராக பணியாற்றியதாகவும், தற்போது லட்சிய ஜனநாயக கட்சியின் திருப்பூர் தெற்கு மாவட்ட செயலாளராக செயல்பட்டு வருவதாகவும் செந்தில்குமார் தெரிவித்துள்ளார்.
மேலும், தனது அரசியல் வளர்ச்சியை பொறுத்துக்கொள்ள முடியாமல், மூவேந்தர் முன்னேற்ற சமூகத்தின் மாவட்ட பொதுச் செயலாளர் துரை ரமேஷ் உள்ளிட்ட சிலர் தன்னைப் பற்றி அவதூறான தகவல்களை பரப்பி வருவதாக அவர் குற்றம்சாட்டியுள்ளார். இதன் தொடர்ச்சியாக நல்லூர் காவல் நிலையத்தில் தன் மீது பல்வேறு புகார்கள் அளிக்கப்பட்டுள்ளதாகவும் மனுவில் குறிப்பிட்டுள்ளார்.
குறிப்பாக நில அபகரிப்பு, ஆள் கடத்தல், கந்து வட்டி, கட்டப் பஞ்சாயத்து உள்ளிட்ட குற்றச்சாட்டுகளின் அடிப்படையில் வழக்குகள் தொடரப்பட்டுள்ளதாகவும், இவை அனைத்தும் அரசியல் நோக்கத்துடன் மேற்கொள்ளப்படும் நடவடிக்கைகள் எனவும் அவர் தெரிவித்துள்ளார். தன்னை அரசியல் ரீதியாக முடக்குவதற்காக இதுபோன்ற நடவடிக்கைகள் மேற்கொள்ளப்படுவதாகவும் மனுவில் குறிப்பிட்டுள்ளார்.
எனவே, தன் மீது அளிக்கப்பட்டுள்ள புகார்கள் மற்றும் வழக்குகள் தொடர்பாக உரிய விசாரணை நடத்த வேண்டும் என்றும், தன்னைப் பற்றி அவதூறு தகவல்களை பரப்பி வருவதாக கூறப்படும் நபர்கள் மீது சட்டப்படி நடவடிக்கை எடுக்க வேண்டும் என்றும் செந்தில்குமார் கோரிக்கை விடுத்துள்ளார். மேலும், சம்பந்தப்பட்டவர்களால் தனது உயிருக்கும் உடைமைகளுக்கும் அச்சுறுத்தல் ஏற்பட வாய்ப்புள்ளதாகக் கூறி, தனக்கு உரிய காவல்துறை பாதுகாப்பு வழங்க வேண்டும் என்றும் மாநகர காவல் ஆணையரிடம் மனு அளித்துள்ளார்.
