கோவை, செப். 22:
தமிழக முதலமைச்சர் அறிவுறுத்தலின்படி, கவுண்டம்பாளையம் சட்டமன்றத் தொகுதிக்குட்பட்ட நரசிம்மநாயக்கன்பாளையம் அரசு உயர்நிலைப் பள்ளி மற்றும் அசோகபுரம் அரசு மேல்நிலைப் பள்ளிகளில் காலை உணவுத் திட்ட விரிவாக்கத்தை எம்.எல்.ஏ. கனிமொழி சந்தோஷ் தொடங்கி வைத்தார்.
இத்திட்டத்தின் மூலம் பள்ளிக்கு வரும் மாணவர்களுக்கு சத்தான மற்றும் தரமான காலை உணவு வழங்கப்படுவதுடன், காலையில் உணவு உட்கொள்ளாமல் பள்ளிக்கு வரும் மாணவர்களின் பசியைப் போக்கி, வகுப்பறையில் கவனத்துடன் கல்வி கற்கும் சூழல் ஏற்படும் என தெரிவிக்கப்பட்டது. கல்வியுடன் ஊட்டச்சத்தையும் இணைத்து செயல்படுத்தப்படும் இத்திட்டம், மாணவர்களின் உடல் நலம் மற்றும் கல்வி முன்னேற்றத்திற்கு உதவும் என கூறப்பட்டது.
தொடக்க நிகழ்ச்சியின்போது பள்ளிகளில் குடிநீர், சுகாதாரம், வகுப்பறைகள் உள்ளிட்ட அடிப்படை வசதிகள் குறித்து கனிமொழி சந்தோஷ் எம்.எல்.ஏ. கேட்டறிந்தார். மாணவர்களின் கல்விச் சூழலை மேம்படுத்த தேவையான வசதிகளை படிப்படியாக ஏற்படுத்த நடவடிக்கை எடுக்கப்படும் என்றும் அவர் தெரிவித்தார்.
பொருளாதார ரீதியாக பின்தங்கிய குடும்பங்களைச் சேர்ந்த மாணவர்களுக்கும் இத்திட்டம் பயனளிக்கும் வகையில், கல்வியுடன் ஊட்டச்சத்தையும் உறுதி செய்யும் நடவடிக்கையாக இது அமையும் என தெரிவிக்கப்பட்டது.
