கோவை, அக். 6:
கோவை ராயல் கேர் மருத்துவமனையில் அதிநவீன மருத்துவ தொழில்நுட்ப வசதிகளுடன் புதிதாக அமைக்கப்பட்டுள்ள நரம்பியல் தீவிர சிகிச்சைப் பிரிவு தொடங்கப்பட்டுள்ளது. 14 படுக்கைகள் கொண்ட இந்த புதிய தீவிர சிகிச்சைப் பிரிவு, நரம்பியல் தொடர்பான அவசர மற்றும் தீவிர சிகிச்சை தேவைப்படும் நோயாளிகளுக்கு மேம்பட்ட மருத்துவ வசதிகளை வழங்கும் வகையில் அமைக்கப்பட்டுள்ளது. இதற்கான தொடக்க விழா ராயல் கேர் மருத்துவமனையில் நடைபெற்றது.
புதிய நரம்பியல் தீவிர சிகிச்சைப் பிரிவை தமிழக பிற்படுத்தப்பட்டோர் நலத்துறை அமைச்சர் வி. சம்பத் குமார் திறந்து வைத்தார். ராயல் கேர் மருத்துவமனையின் நிர்வாக இயக்குநர் டாக்டர் மாதேஸ்வரன் தலைமையில் நடைபெற்ற இந்த நிகழ்ச்சியில் மருத்துவர்கள், மருத்துவமனை நிர்வாகிகள் மற்றும் பல்வேறு துறை சார்ந்த முக்கிய பிரமுகர்கள் கலந்து கொண்டனர்.
நிகழ்ச்சியில் பேசிய அமைச்சர் வி. சம்பத் குமார், தமிழகத்தில் மருத்துவத் துறையின் வளர்ச்சிக்காக அரசு சார்பில் பல்வேறு நடவடிக்கைகள் தொடர்ந்து மேற்கொள்ளப்பட்டு வருவதாக தெரிவித்தார். பொதுமக்களுக்கு தரமான மருத்துவ சேவைகள் கிடைப்பதை உறுதி செய்யும் வகையில் மருத்துவ கட்டமைப்புகள் மேம்படுத்தப்பட்டு வருவதாகவும் அவர் குறிப்பிட்டார்.
மேலும், முதலமைச்சரின் விரிவான மருத்துவக் காப்பீட்டுத் திட்டத்தின் கீழ் வழங்கப்படும் சிகிச்சைக்கான ஆண்டு நிதி வரம்பு ரூ.5 லட்சத்தில் இருந்து ரூ.25 லட்சமாக உயர்த்தப்பட்டுள்ளதாகவும், இதன் மூலம் பல்வேறு தரப்பினரும் உயர்தர மருத்துவ சிகிச்சைகளைப் பெறுவதற்கான வாய்ப்பு அதிகரித்துள்ளதாகவும் அமைச்சர் தெரிவித்தார்.
விபத்துகள் ஏற்படும் சூழ்நிலையில் முதல் 48 மணி நேரம் மிகவும் முக்கியமான காலகட்டமாகும் என்றும் அமைச்சர் குறிப்பிட்டார். இந்த காலகட்டத்தில் உயிரைக் காக்கும் அவசர மற்றும் உயர் சிகிச்சை வழங்கப்படுவது மிகவும் அவசியம் என்றும், அங்கீகரிக்கப்பட்ட அரசு மற்றும் தனியார் மருத்துவமனைகளில் விபத்தில் சிக்கியவர்களுக்கு அவசர உயர் சிகிச்சை இலவசமாக வழங்கப்பட்டு வருவதால் விபத்துகளால் ஏற்படும் உயிரிழப்புகள் குறைந்துள்ளதாகவும் அவர் தெரிவித்தார்.
கோவை மருத்துவத் துறையில் உலகத் தரத்திலான நவீன தொழில்நுட்பங்களை அறிமுகப்படுத்துவதில் ராயல் கேர் மருத்துவமனை தொடர்ந்து முக்கிய பங்காற்றி வருவது பெருமைக்குரியது என்றும் அமைச்சர் வி. சம்பத் குமார் தெரிவித்தார். நோயாளிகளுக்கு நவீன மருத்துவ வசதிகளை ஒரே இடத்தில் வழங்குவதற்கான மருத்துவ கட்டமைப்புகளை மேம்படுத்தி வருவதாகவும் அவர் பாராட்டினார்.
இதனைத் தொடர்ந்து ராயல் கேர் மருத்துவமனையின் நிர்வாக இயக்குநர் டாக்டர் மாதேஸ்வரன் பேசுகையில், நோயாளிகளின் நலனை மையமாகக் கொண்டு மருத்துவத் துறையில் உலக அளவில் பயன்படுத்தப்படும் முன்னணி தொழில்நுட்பங்கள் மற்றும் சிகிச்சை முறைகளை தொடர்ந்து அறிமுகப்படுத்தி வருவதாக தெரிவித்தார். குறிப்பாக, தீவிர நரம்பியல் பாதிப்புகளுக்கு விரைவான மருத்துவ கண்காணிப்பு மற்றும் சிகிச்சை வழங்கும் வகையில் புதிய நரம்பியல் தீவிர சிகிச்சைப் பிரிவு உருவாக்கப்பட்டுள்ளதாக கூறினார்.
புதிய பிரிவின் சிறப்பம்சங்கள் குறித்து நரம்பியல் தீவிர சிகிச்சைப் பிரிவின் தலைமை மருத்துவர் டாக்டர் சிவக்குமார் விளக்கமளித்தார். 14 படுக்கைகளுடன் அமைக்கப்பட்டுள்ள இந்த பிரிவில் நரம்பியல் தொடர்பான தீவிர பாதிப்புகளுக்கு தேவையான கண்காணிப்பு மற்றும் சிகிச்சை வசதிகள், நவீன மருத்துவ உபகரணங்கள் மற்றும் மேம்பட்ட மருத்துவக் கட்டமைப்புகள் ஏற்படுத்தப்பட்டுள்ளதாக அவர் தெரிவித்தார்.
நரம்பியல் தொடர்பான அவசர நிலைகள், தீவிர சிகிச்சை தேவைப்படும் நோயாளிகள் உள்ளிட்டோருக்கு ஒருங்கிணைந்த முறையில் சிகிச்சை வழங்கும் வகையில் இந்த புதிய பிரிவு செயல்படும் என மருத்துவமனை நிர்வாகம் தெரிவித்துள்ளது. நவீன தொழில்நுட்ப வசதிகளுடன் கூடிய இந்த பிரிவு மூலம் நோயாளிகளுக்கு விரைவான மருத்துவ மதிப்பீடு, தொடர்ச்சியான கண்காணிப்பு மற்றும் தேவையான தீவிர சிகிச்சைகளை வழங்குவதற்கான வாய்ப்பு ஏற்படும் என தெரிவிக்கப்பட்டது.
இந்த தொடக்க விழாவில் சூலூர் சட்டமன்ற உறுப்பினர் என்.எம். சுகுமார், மருத்துவ இயக்குனர் பரந்தாமன் சேதுபதி, சி.ஓ.ஓ. மணி செந்தில் குமார், மருத்துவமனையின் மார்க்கெட்டிங் பிரிவு சீனியர் பொது மேலாளர் வெங்கடேஷ் உள்ளிட்ட மருத்துவர்கள், செவிலியர்கள் மற்றும் மருத்துவமனை நிர்வாகிகள் பலர் கலந்து கொண்டனர்.
