கோவை, அக். 16:
கோவை காந்திபுரத்தில் ரூ.301 கோடி மதிப்பில் கட்டப்பட்டுள்ள பெரியார் அறிவுலகம் எனப்படும் நூலகம் மற்றும் அறிவியல் மையத்தை முதல்வர் விஜய் இன்று திறந்து வைத்தார். தரைத்தளம் மற்றும் 7 தளங்களுடன் பிரம்மாண்டமாக அமைக்கப்பட்டுள்ள இம்மையம், ஏ மற்றும் பி என இரு பிரிவுகளாக வடிவமைக்கப்பட்டுள்ளது.
மாற்றுத்திறனாளிகளுக்கான நூலகம், 350 பேர் அமரக்கூடிய அரங்கம், நவீன அறிவியல் உபகரணங்கள் கொண்ட அறிவியல் மையம், கோளரங்கம் மற்றும் விண்வெளி தொடர்பான காட்சிகளை அறிந்துகொள்ளும் வசதிகள் உள்ளிட்டவை பார்வையாளர்களைக் கவரும் வகையில் அமைக்கப்பட்டுள்ளன.
ஒவ்வொரு தளத்திலும் வெவ்வேறு பயன்பாடுகளுக்கான வசதிகள் ஏற்படுத்தப்பட்டுள்ளன. சிறுவர்களுக்கான நூலகம், சொந்தப் புத்தகங்களைக் கொண்டு படிப்பதற்கான இடம், போட்டித் தேர்வுகளுக்கான பயிற்சி மையம், நிர்வாகப் பிரிவு ஆகியவை தொடக்கத் தளங்களில் அமைந்துள்ளன. மேலும், தமிழ் நூல்கள், வரலாற்றுப் புத்தகங்கள், பருவ இதழ்கள், ஆங்கில நூல்கள், ஆங்கிலம் கற்கும் பிரிவு, ஸ்டார்ட்அப் நிறுவனங்களுக்கான இன்குபேஷன் மையம் மற்றும் டிஜிட்டல் நூலகம் ஆகியவையும் இடம்பெற்றுள்ளன. கல்வி, அறிவியல், வாசிப்பு மற்றும் ஆராய்ச்சியை ஒருங்கிணைக்கும் வகையில் உருவாக்கப்பட்டுள்ள பெரியார் அறிவுலகம், மாணவர்கள் மற்றும் இளைஞர்களுக்குப் பயனளிக்கும் முக்கிய மையமாக அமைந்துள்ளது.
