மார்த்தாண்டம் பள்ளிவாசலில் மோதல்

மார்த்தாண்டம், மார்- 19

மார்த்தாண்டத்தில் முஸ்லீம் பள்ளிவாசல் ஒன்று உள்ளது. தற்போது இஸ்லாமியர்களின் புனித ரமலான் மாதம் நடந்து வருவதால் நோன்பு இருக்கும் இஸ்லாமியர்கள் தினமும் பள்ளிவாசலில் சென்று தொழுகை நடத்துவது வழக்கம்.
இந்த நிலையில் கடந்த 9-ம் தேதி இந்த பள்ளி வாசலில் தேர்தல் நடந்துள்ளது. தேர்தலில் அரசு ஊழியர்கள் ஆக பணி புரியும் இரண்டு பேர் போட்டியிட்டனர். ஆனால் அரசு பணியில் இருப்பவர்கள் தேர்தலில் போட்டியிடக் கூடாது என கீழப்பம்மம் பகுதியை சேர்ந்த ஷேக் முகமது (52) என்பவர் உட்பட ஒரு தரப்பினர் எதிர்ப்பு தெரிவித்தனர்.
ஆனால் கொடுங்குளம் பகுதியை சேர்ந்த வக்கீல் சர்தார் ஷா என்பவர் உட்பட மற்றொரு தரப்பினர் ஆதரவு தெரிவித்தனர். இதனால் இருதரப்பும் இடையே பிரச்சனை இருந்து வந்தது.
இந்த நிலையில் நேற்று முன்தினம் பள்ளிவாசலில் வழக்கம் போல் தொழுகை நடைபெற்றது. அப்போது வக்கீல் சர்தார் ஷா (50) நோன்பு கஞ்சி தயாரிப்பதற்கான அரிசியை வழங்கிக் கொண்டிருந்தார். அந்த நேரம் அங்கு வந்த ஷேக்முகமது உட்பட 12 பேர் சேர்ந்து கம்பியால் அவரை தாக்கியதாக கூறப்படுகிறது. அது போன்று சர்தார்ஷா உட்பட 6 பேர் ஷேக் முகமதுவை தாக்கினார்களாம். இது குறித்து மார்த்தாண்டம் காவல் நிலையத்தில் மாறி மாறி புகார் அளித்தனர். புகாரின் பேரில் இருதரப்பை சேர்ந்த 18 பேர் மீது போலீசார் வழக்கு பதிவு செய்து விசாரணை நடத்தி வருகின்றனர்.