நாகர்கோவில் மார்ச் 18
குமரி மாவட்டம் ராஜாக்கமங்கலம் பகுதியை சேர்ந்த 55 வயதுடைய ஒருவர் எல்ஐசி-ல் முகவராக உள்ளார். இவருக்கு ஒரு மகனும், 2 மகள்களும் உள்ளனர்.கருத்து வேறுபாடு காரணமாக இவர் தனது மனைவியை 6 ஆண்டுகளுக்கு முன்பு பிரிந்து விட்டார். தற்போது இவரின் வயதான தாயார், உடல்நிலை சரியில்லாமல் இருந்து வருகிறார் என்பதால் தனது தாயாரை உடனிருந்து கவனிக்க வேண்டும் என்பதற்காக 2வது திருமணம் செய்ய முடிவு செய்தார். இதற்காக திருமண வரன் தேடும் இணையதளத்தில் பதிவு செய்தார். இதை பார்த்து மதுரையை சேர்ந்த முருகேஸ்வரி என்ற பெண் இவரை தொடர்பு கொண்டு பேசியுள்ளார்.
இதையடுத்து மதுரையிலிருந்து முருகேஸ்வரி, அவரது தங்கை கார்த்திகையாயினி (வயது 28), முத்துலட்சுமி (வயது 45), பொண்ணு (வயது 43) ஆகிய நான்கு பேர், எல்ஐசி முகவரின் வீட்டிற்கு மாப்பிள்ளை பார்ப்பதற்காக வந்தனர்.அப்போது 2-வது திருமணம் செய்ய இருக்கும் பெண்ணுக்கு கொடுக்க இருக்கும் 8 பவுன் தங்க நகைகளை எல்ஐசி முகவர் அவர்களிடம் காண்பித்தார். இதனை மாப்பிள்ளை பார்க்க வந்த பெண்கள் உன்னிப்பாக கவனித்தனர். பின்னர், அந்த நகைகளை அருகே இருந்த மேஜையின் டிராயரில் வைத்து விட்டு வந்தவர்களை உபசரிப்பதில் எல்ஐசி முகவர் தீவிரமாக இருந்தார். மாப்பிள்ளை பார்க்க வந்த 4 பெண்களும் அன்று இரவு எல்ஐசி முகவரின் வீட்டிலேயே தங்கிவிட்டு காலையில் மதுரைக்கு புறப்படுவதாக கூறிவிட்டு கிளம்பினர்.
இதற்கிடையே, எல்ஐசி முகவர் மேஜையில் வைத்திருந்த நகைகளை பார்த்தபோது அவற்றை காணவில்லை. இதனால் அதிர்ச்சி அடைந்த அவர் தனது மகன், மகளிடம் தெரிவித்தார். மேலும் புதிதாக வீட்டுக்கு மாப்பிள்ளை பார்க்க வந்த அந்த பெண்கள் திருடியிருப்பார்களோ என்ற சந்தேகம் எழுந்ததால் அந்த எல்.ஐ.சி முகவர்,முருகேஸ்வரிக்கு போன் செய்தார். ஆனால் அது ஸ்விட்ச் ஆப் என வந்ததால், அவருடன் வந்த மற்ற பெண் ஒருவருக்கு போன் செய்தார்.போனை எடுத்த அப்பெண் உங்களை முருகேஸ்வரிக்கு பிடிக்கவில்லை என்பதால் திருமணத்துக்கு சம்மதம் கிடையாது என்றார். ஆனால் எல்ஐசி முகவர் நகைகள் பற்றி கேட்டபோது அவர் மழுப்பலாக பேசியதால் இச்சம்பவம் குறித்து அவர் போலீஸ் நிலையத்தில் புகார் கொடுத்தார்.
இது தொடர்பாக போலீசார் வழக்குப் பதிவு செய்து மதுரையில் இருந்து மாப்பிள்ளை பார்ப்பதற்காக வந்த 4 பெண்களையும் பிடித்து விசாரித்த போது அவர்கள் நகைகளை திருடியதை ஒப்புக்கொண்டனர். இதனால் 4 பெண்களையும் கைது செய்த போலீசார் இவர்கள் மீது மேலும் ஏதேனும் வழக்குகள் உள்ளதா என்று விசாரித்து வருகின்றனர். இவர்கள் 4 பேருக்குமே திருமணம் ஆகியிருக்கும் தகவலும் காவல்துறையினரின் விசாரணையில் தெரியவந்தது.
