தூத்துக்குடி , அக்: 09
தூத்துக்குடி மாவட்டம், விளாத்திகுளத்தில் அமைந்துள்ள 400 ஆண்டுகள் பழமையான அருள்மிகு ஸ்ரீ மீனாட்சி சுந்தரேஸ்வரர் ஆலயத்தில், புரட்டாசி மாத தேய்பிறை பிரதோஷத்தை முன்னிட்டு சிறப்பு வழிபாடுகள் நடைபெற்றன.
இதையொட்டி, நந்திகேஸ்வரர் மற்றும் மீனாட்சி சுந்தரேஸ்வரருக்கு பால், தயிர், மஞ்சள், இளநீர், பன்னீர், சந்தனம், திருநீறு உள்ளிட்ட பல்வேறு பொருட்களால் சிறப்பு அபிஷேகங்கள் செய்யப்பட்டன. தொடர்ந்து, செவ்வரளி, மல்லிகை மற்றும் வில்வ இலை உள்ளிட்ட பல்வேறு மலர்களால் சுவாமிகளுக்கு மாலைகள் அணிவிக்கப்பட்டு சிறப்பு அலங்காரம் செய்யப்பட்டது.
பின்னர், பிரதோஷத்தை முன்னிட்டு ரிஷப வாகனத்தில் எழுந்தருளிய சந்திரசேகரர், உமாமகேஸ்வரி ஆகியோர் பக்தர்களுக்கு அருள்பாலித்தனர். இதனைத் தொடர்ந்து, சிவ நாமங்கள் முழங்க நந்திகேஸ்வரர் மற்றும் மீனாட்சி சுந்தரேஸ்வரருக்கு பஞ்சமுக தீபாராதனை நடைபெற்றது.
இந்தச் சிறப்பு பிரதோஷ வழிபாட்டில் விளாத்திகுளம் மற்றும் அதன் சுற்றுவட்டாரப் பகுதிகளைச் சேர்ந்த ஏராளமான பக்தர்கள் கலந்து கொண்டு சுவாமி தரிசனம் செய்து இறையருள் பெற்றனர்.
