திருப்பூர், அக். 6:
தாராபுரம் சட்டமன்ற தொகுதி இடைத்தேர்தல்–2026-ஐ முன்னிட்டு, வாக்கு எண்ணும் மையத்தில் மேற்கொள்ள வேண்டிய பாதுகாப்பு மற்றும் சட்டம்–ஒழுங்கு ஏற்பாடுகள் குறித்து திருப்பூர் மாநகர காவல் ஆணையர் ராஜேஸ்வரி தலைமையில் ஆலோசனைக் கூட்டம் நடைபெற்றது.
திருப்பூர் எல்.ஆர்.ஜி அரசு மகளிர் கலைக் கல்லூரி வளாகத்தில் நடைபெற்ற இக்கூட்டத்தில், தேர்தலுக்கு முந்தைய காலம், வாக்குப்பதிவு நாள், வாக்கு எண்ணும் மையத்தின் பாதுகாப்பு மற்றும் வாக்கு எண்ணிக்கை நாள் என அனைத்து நிலைகளிலும் மேற்கொள்ள வேண்டிய பாதுகாப்பு நடவடிக்கைகள் குறித்து விரிவாக ஆலோசிக்கப்பட்டது.
தேர்தல் பணியில் ஈடுபடும் காவல்துறையினருக்கு தேர்தல் நடத்தை விதிமுறைகள் அமலில் உள்ளதால், அவற்றை முறையாக கடைப்பிடிப்பது, பாதுகாப்புப் பணிகளை மேற்கொள்வது, மின்னணு வாக்குப்பதிவு இயந்திரங்கள் மற்றும் வாக்கு எண்ணும் மையத்தின் பாதுகாப்பை உறுதி செய்வது குறித்து அறிவுரைகள் வழங்கப்பட்டன.
மேலும், அனுமதி இல்லாத நபர்கள் வாக்கு எண்ணும் மையத்திற்குள் அல்லது அதன் சுற்றுப்பகுதிகளில் நுழைவதை கட்டுப்படுத்துதல், கூட்ட நெரிசலை ஒழுங்குபடுத்துதல், போக்குவரத்தை சீராக பராமரித்தல் உள்ளிட்ட பல்வேறு பாதுகாப்பு அம்சங்கள் குறித்தும் காவல்துறையினருக்கு அறிவுறுத்தப்பட்டது.
தேர்தல் காலத்தில் சட்டம்–ஒழுங்கு பிரச்சினைகள் ஏற்படாத வகையில் தேவையான முன்னெச்சரிக்கை நடவடிக்கைகளை மேற்கொள்ளவும், தேர்தல் தொடர்பான பணிகளில் காவல்துறையினர் ஒருங்கிணைந்து செயல்படவும் காவல் ஆணையர் அறிவுறுத்தினார்.
இந்த ஆலோசனைக் கூட்டத்தில் மாநகர காவல் துணை ஆணையர்கள் (தலைமையிடம், வடக்கு மற்றும் தெற்கு), திருப்பூர் மாநகர அனைத்து காவல் உதவி ஆணையர்கள் மற்றும் காவல் ஆய்வாளர்கள் உள்ளிட்டோர் கலந்து கொண்டனர்.
