ஈரோடு, செப். 8:
ஈரோட்டில் செயல்பட்டு வரும் ‘பாசம் ஃபவுண்டேஷன்’ அறக்கட்டளையில் நிதி முறைகேடு, கணக்கு பராமரிப்பில் குறைபாடு உள்ளிட்ட புகார்கள் தொடர்பாக விசாரணை நடத்தக் கோரி, அந்த அமைப்பின் பொருளாளர் யாசர் அராபத், ஈரோடு மாவட்ட காவல் கண்காணிப்பாளரிடம் புகார் மனு அளித்துள்ளார்.
மனுவில், அறங்காவலர்கள் விபுல் மற்றும் வாசுதேவன் மீது பல்வேறு குற்றச்சாட்டுகளை முன்வைத்துள்ளார். பொதுமக்களிடம் வசூலிக்கப்படும் நிதிக்கு முறையான கணக்குகள் காட்டப்படவில்லை என்றும், காசோலைகளில் முறைகேடு, வங்கி கணக்குகளை முறைப்படுத்தாதது, நன்கொடையாளர்கள் விவரங்களை பராமரிக்காதது உள்ளிட்ட குற்றச்சாட்டுகள் உள்ளதாகவும் தெரிவித்துள்ளார். மேலும், அமைப்பின் தீர்மானப் புத்தகம் முறையாக பராமரிக்கப்படவில்லை என்றும் புகார் கூறியுள்ளார்.
ஏழைத் தொழிலாளர்களுக்கு உதவி செய்வதாகக் கூறி பொதுமக்களிடம் நிதி வசூலித்து, அதற்கான முறையான கணக்குகளை சமர்ப்பிக்கவில்லை என்றும், தட்டிக் கேட்கும் உறுப்பினர்கள் நீக்கப்படுவதாகவும் மனுவில் குற்றம் சாட்டப்பட்டுள்ளது. கடந்த ஆகஸ்ட் 27-ஆம் தேதி ஈரோடு நகர காவல் நிலையத்தில் நடைபெற்ற விசாரணையில் ஆஜராகி, தமக்குத் தெரிந்த விவரங்களை எழுத்துப்பூர்வமாக சமர்ப்பித்ததாகவும் யாசர் அராபத் தெரிவித்துள்ளார்.
தன் மீது பொய்யான புகார்கள் பரப்பப்படுவதாகவும் கூறியுள்ள அவர், பாசம் ஃபவுண்டேஷன் தொடர்பான புகார்களை முழுமையாக விசாரிக்க தனி விசாரணைக் கமிட்டி அமைத்து, உரிய நடவடிக்கை எடுக்க வேண்டும் என காவல் கண்காணிப்பாளரிடம் வலியுறுத்தியுள்ளார். இவை அனைத்தும் புகாரில் தெரிவிக்கப்பட்ட குற்றச்சாட்டுகள்; அவற்றின் உண்மைத் தன்மை விசாரணையின் முடிவிலேயே உறுதி செய்யப்பட வேண்டும்.
