நாகர்கோவில், அக்.7:
கன்னியாகுமரி மாவட்டம் கருங்கல் கருமாவிளை சிஎஸ்ஐ சமுதாய நலக்கூடத்தில், முஞ்சிறை மற்றும் கிள்ளியூர் ஊராட்சி ஒன்றியங்களைச் சேர்ந்த 200 கர்ப்பிணி தாய்மார்களுக்கு சமுதாய வளைகாப்பு விழா நடைபெற்றது. மாவட்ட சமூக நலன் மற்றும் மகளிர் உரிமைத்துறை மற்றும் ஒருங்கிணைந்த குழந்தைகள் வளர்ச்சித் திட்டத்தின் சார்பில் நடைபெற்ற இந்நிகழ்ச்சிக்கு மாவட்ட ஆட்சித்தலைவர் மு.பிரதாப் தலைமை வகித்தார்.
விழாவில் சுற்றுலாத்துறை அமைச்சர் செ.ராஜேஷ்குமார் கலந்து கொண்டு கர்ப்பிணி தாய்மார்களுக்கு சமுதாய வளைகாப்பு நடத்தி வைத்து, சீர்வரிசை பொருட்களை வழங்கினார். அப்போது பேசிய அமைச்சர், தமிழ்நாடு அரசு சார்பில் ஆண்டுதோறும் சமுதாய வளைகாப்பு விழாக்கள் நடத்தப்பட்டு வருவதாகவும், கர்ப்பிணிகளுக்கு ஒருங்கிணைந்த குழந்தைகள் வளர்ச்சித் திட்டத்தின் மூலம் பல்வேறு விழிப்புணர்வுகள் மற்றும் வழிகாட்டுதல்கள் வழங்கப்பட்டு வருவதாகவும் தெரிவித்தார்.
மேலும், அரசு மருத்துவமனைகளில் பிரசவிக்கும் தாய்மார்களுக்கு ‘தாய் மாமன் தங்க மோதிரம்’ உள்ளிட்ட பல்வேறு திட்டங்கள் செயல்படுத்தப்பட்டு வருவதாகவும் அமைச்சர் தெரிவித்தார்.
முன்னதாக, ஊட்டச்சத்து விழிப்புணர்வை ஏற்படுத்தும் வகையில் அமைக்கப்பட்டிருந்த உணவு பிரமிடு, சிறுதானிய உணவுகள் மற்றும் சரிவிகித உணவு முறைகள் குறித்த கண்காட்சியை அமைச்சர் செ.ராஜேஷ்குமார் மற்றும் மாவட்ட ஆட்சித்தலைவர் மு.பிரதாப் ஆகியோர் பார்வையிட்டனர்.
இந்நிகழ்ச்சியில் பத்மநாபபுரம் சார் ஆட்சியர் மாலதி, ஒருங்கிணைந்த குழந்தை வளர்ச்சி திட்ட அலுவலர் (பொறுப்பு) காயத்ரி, கருங்கல் பேரூராட்சி தலைவர் சிவராஜ், முன்னாள் பெற்றோர் ஆசிரியர் கழக தலைவர் சிந்துகுமார், கர்ப்பிணி தாய்மார்கள் மற்றும் பொதுமக்கள் உள்ளிட்ட பலர் கலந்து கொண்டனர்.
