ஈரோடு, செப்.20
புரட்டாசி மாதத்தின் முதல் சனிக்கிழமையை முன்னிட்டு, ஈரோடு கோட்டை பகுதியில் உள்ள ஸ்ரீ கோட்டை பெருமாள் கோவிலில் நேற்று சிறப்பு வழிபாடுகள் நடைபெற்றன. அதிகாலை முதலே ஏராளமான பக்தர்கள் கோவிலுக்கு வருகை தந்து, நீண்ட வரிசையில் காத்திருந்து சுவாமி தரிசனம் செய்தனர். பெருமாள் சுவாமிக்கு சிறப்பு அபிஷேகம், அலங்காரம் மற்றும் பூஜைகள் நடைபெற்றன.
கோவில் நுழைவு வாயில் அருகே பக்தர்களுக்கு அன்னதானமும் வழங்கப்பட்டது. இதனிடையே, புரட்டாசி சனிக்கிழமைகளில் வழக்கமாக அமைக்கப்படும் சிவப்பு நிற நடைபாதை கம்பளம் இந்த ஆண்டு முதல் சனிக்கிழமையில் அமைக்கப்படாததால், பக்தர்கள் சுட்டெரிக்கும் வெயிலில் நீண்ட நேரம் காத்திருக்க வேண்டிய நிலை ஏற்பட்டதாக கூறப்படுகிறது. குறிப்பாக குழந்தைகள், பெண்கள் மற்றும் வயதானவர்கள் சிரமத்திற்கு உள்ளானதாக பக்தர்கள் தெரிவித்தனர்.
அடுத்தடுத்த புரட்டாசி சனிக்கிழமைகளிலும் அதிகளவில் பக்தர்கள் வருகை தருவார்கள் என்பதால், வெயிலில் காத்திருக்கும் நிலையை தவிர்க்க தேவையான முன்னேற்பாடுகளை கோவில் நிர்வாகம் மேற்கொள்ள வேண்டும் என பக்தர்கள் கோரிக்கை விடுத்துள்ளனர்.
