முதுகுளத்தூர், செப். 28:
இராமநாதபுரம் மாவட்டம், முதுகுளத்தூர் வட்டம் அரசு மேல்நிலைப் பள்ளி என்.எஸ்.எஸ். சார்பில் மு.தூரி கிராமத்தில் 3-வது நாள் முகாம் நடைபெற்றது. செப். 28-ம் தேதி உலக ரேபிஸ் தினத்தை முன்னிட்டு, உலக ரேபிஸ் நோய் விழிப்புணர்வு மற்றும் கால்நடை மருத்துவ முகாம் நடைபெற்றது.
பள்ளி உதவித் தலைமை ஆசிரியர் அருள்தாஸ் தலைமையில் நடைபெற்ற நிகழ்ச்சியில், நாட்டுநலப் பணித்திட்ட மாவட்ட தொடர்பு அலுவலர் மங்களநாதன் முன்னிலை வகித்தார். என்.எஸ்.எஸ். திட்ட அலுவலர் தர்மராஜ் வரவேற்புரையாற்றினார்.
முதுகுளத்தூர் கால்நடை உதவி மருத்துவர் டாக்டர் ரவிச்சந்திரன், மாவட்ட விலங்குகள் நல அலுவலர் இளம்பருதி மற்றும் கால்நடை ஆய்வாளர் வீரன் ஆகியோர் 20-க்கும் மேற்பட்ட வளர்ப்பு நாய்களுக்கு ரேபிஸ் தடுப்பூசி செலுத்தினர். மேலும், வீடுகளில் வளர்க்கப்படும் நாய், பூனை உள்ளிட்ட செல்லப்பிராணிகளுக்கு அவ்வப்போது தடுப்பூசி செலுத்த வேண்டியதன் அவசியம் குறித்தும், ரேபிஸ் பாதித்த நாய் கடியால் ஏற்படும் பாதிப்புகள் மற்றும் அதற்கான தடுப்பு நடவடிக்கைகள் குறித்தும் விழிப்புணர்வு ஏற்படுத்தினர்.
இதனைத் தொடர்ந்து கால்நடைகளுக்கு காணை நோய், குடற்புழு நீக்கம் உள்ளிட்ட பல்வேறு நோய்களுக்கு சிகிச்சை அளிக்கப்பட்டது. பசு மாடுகளுக்கு சினைப் பரிசோதனையும் மேற்கொள்ளப்பட்டது. நிகழ்ச்சியின் நிறைவில் தமிழாசிரியர் ரஜியாபானு நன்றி கூறினார்.
