மார்த்தாண்டம், ஜன. 24 –
கன்னியாகுமரி மாவட்டத்தில் மஹா சிவாலய ஓட்டம் நடக்கும் 12 சிவாலயங்களில் 2வது சிவாலயமான ரிஷப ராசி பரிகார ஸ்தலமான திக்குறிச்சி மஹா தேவர் கோயில் குழித்துறை தாமிரபரணி ஆற்றின் கரையில் அமைந்துள்ளது. இந்த கோயிலின் அருகே திக்குறிச்சி பயணம் பால பணிகள் நடைபெற்ற போது ஏற்பட்ட நீரோட்ட மாற்றத்தால் கோயில் சுற்று சுவரோடு சேர்த்து இருந்த மண் திட்டு ஆற்று நீர் இழுத்து சென்றது.
அந்த நேரத்தில் பக்தர்கள் முயற்சியால் அந்த பகுதியில் பெரிய கற்கள் கொட்டபட்டது. அந்த கற்களும் ஆற்று நீர் இழுத்து சென்றதால் சுற்று சுவர் எப்போது வேண்டுமானாலும் இடிந்து விழும் அபாயகரமான சூழல் ஏற்பட்டது. தொடர்ந்து, பக்தர்கள் மற்றும் இந்து இயக்கங்கள் பல வித கோரிக்கை விடுத்த நிலையில் கடந்த 3 ஆண்டுகளுக்கு முன்பு இந்து அறநிலையத்துறை அமைச்சர் சேகர் பாபு, இந்து அறநிலையத்துறை செயலாளர், மாவட்ட ஆட்சியர், அமைச்சர் மனோதங்கராஜ் உட்பட அதிகாரிகள் கோயிலில் நேரடியாக ஆய்வு செய்தனர்.
பின்னர் ரூ 84 லட்சம் பக்கச்சுவர் கட்ட திருக்கோயில்கள் நிதியில் இருந்து நிதி ஒதுக்கீடு செய்யப்பட்டது. பின்னர் பொது பணி துறைக்கு கொடுத்து ஒப்பந்தம் செய்து ஒப்பந்ததாரர் முன்னிலையில் அமைச்சர் மனோதங்கராஜ் பணிகளை துவங்கி வைத்தார். ஆனால் தொடர்ந்து பணிகளை செய்யாமல் ஒப்பந்ததாரர் பணிகளை கிடப்பில் போட்டுள்ளார். இதனால் எப்போது வேண்டுமானாலும் மதில் சுவர் இடியும் அபாயம் ஏற்பட்டுள்ளது. சுற்று மதில் சுவர் இடிந்தால் கோயிலுக்கும் பாதிப்பு ஏற்படும் அபாயம் ஏற்பட்டுள்ளது.
இந்த கோயிலில் தினம் காலை மாலை நூற்றுக்கணக்கான பக்தர்கள் வருகை தருகின்றனர். பிரதோஷம், திருவாதிரை, பெளர்ணமி உட்பட விசேஷ தினங்களில் நூற்றுக்கணக்கான பக்தர்கள் வருகை தருகின்றனர். வரும் பிப்பிரவரி 14,15 தினங்களில் மஹா சிவாலய ஓட்டம், சிவராத்திரி திருவிழா அன்று லட்சக்கணக்கான பக்தர்கள் வருகை தருவார்கள்.
ஏதாவது அசம்பாவிதம் நடைபெற்றால் பக்தர்களும் பாதிப்பு ஏற்படும் அபாயம் ஏற்பட்டுள்ளதால் உடனடியாக நடவடிக்கை எடுக்காவிட்டால் பக்தர்களை திரட்டி இந்து முன்னணி சார்பில் உண்ணாவிரத போராட்டம் நடத்த போவதாக இந்து முன்னணி மேல்புறம் ஒன்றிய தலைவர் அருண் தெரிவித்து உள்ளார். பொது பணி துறை அதிகாரிகளிடம் பல முறை இது சம்பந்தமாக புகார் அளித்தும் கனிம வளத்துறை அதிகாரிகள் அனுமதி அளிக்க காலதாமதம் செய்வதாக அலட்சியமாக பதில் அளிப்பதாகவும் குற்றச்சாட்டு எழுப்பியுள்ளனர்.
