திருப்பூர், அக்.08:
தாராபுரம் (தனி) தொகுதி இடைத்தேர்தலில் பதிவான வாக்குப்பதிவு இயந்திரங்கள் திருப்பூர் எல்.ஆர்.ஜி. கல்லூரியில் உள்ள ஸ்ட்ராங் ரூமில் வேட்பாளர்கள் மற்றும் முகவர்கள் முன்னிலையில் சீல் வைக்கப்பட்டன. வேட்பாளர்கள் வருகைக்காக மாவட்ட கலெக்டர் மற்றும் தேர்தல் அதிகாரிகள் சுமார் ஒரு மணி நேரம் காத்திருந்தனர்.
தாராபுரம் தொகுதியில் 320 வாக்குச்சாவடிகள் 180 வாக்குப்பதிவு மையங்களில் அமைக்கப்பட்டிருந்த நிலையில், 2,23,306 வாக்காளர்களில் 1,79,214 பேர் வாக்களித்துள்ளனர். மொத்த வாக்குப்பதிவு 80.25 சதவீதமாக பதிவானது. வாக்குப்பதிவு முடிந்ததும் பலத்த போலீஸ் பாதுகாப்புடன் இயந்திரங்கள் வாக்கு எண்ணும் மையத்திற்கு கொண்டு வரப்பட்டன.
நேற்று காலை 9.30 மணிக்கு ஸ்ட்ராங் ரூம் சீல் வைக்கும் பணிக்காக கலெக்டர் மனிஷ், தேர்தல் பொதுப்பார்வையாளர் சின்மய் புண்ட்லிக்ராவ் கோட்மரோ உள்ளிட்ட அதிகாரிகள் கல்லூரிக்கு வந்தனர். அப்போது அதிமுக வேட்பாளர் பானுமதி மட்டும் வந்திருந்த நிலையில், மற்ற வேட்பாளர்கள் வராததால் அதிகாரிகள் காத்திருந்தனர்.
பின்னர் தலைமை முகவர்கள் முன்னிலையில் காலை 10.30 மணியளவில் வாக்குப்பதிவு இயந்திரங்கள் வைக்கப்பட்டிருந்த ஸ்ட்ராங் ரூம் சீல் வைக்கப்பட்டது. நாளை வாக்கு எண்ணிக்கை நடைபெற உள்ள நிலையில், மையத்தில் 3 அடுக்கு போலீஸ் பாதுகாப்பு மற்றும் 64 கண்காணிப்பு கேமராக்கள் அமைக்கப்பட்டுள்ளன. அங்கீகரிக்கப்பட்ட நபர்கள் மட்டுமே பலத்த சோதனைக்குப் பிறகு வாக்கு எண்ணும் மையத்திற்குள் அனுமதிக்கப்படுகின்றனர்.
