பிரதமர், முதல்வருக்கு நுகர்வோர் பாதுகாப்புச் சங்கம் கோரிக்கை
நாகர்கோவில், செப். 2:
கன்னியாகுமரி மாவட்டத்தில் அரசுக்குச் சொந்தமான 832 ஏக்கர் நிலத்தில் பன்னாட்டு கிரீன்ஃபீல்ட் விமான நிலையம் அமைக்க நடவடிக்கை எடுக்க வேண்டும் என பிரதமர் நரேந்திர மோடி மற்றும் தமிழக முதல்வர் மு.க. ஸ்டாலினுக்கு குமரி மாவட்ட நுகர்வோர் பாதுகாப்புச் சங்கம் கோரிக்கை விடுத்துள்ளது.
இதுதொடர்பாக சங்கத் தலைவரும், ரயில்வே ஆலோசனைக் குழு உறுப்பினருமான எஸ்.ஆர். ஸ்ரீராம் அனுப்பியுள்ள மனுவில், சர்வதேச சுற்றுலாத் தலமான கன்னியாகுமரிக்கு தினமும் ஆயிரக்கணக்கான உள்நாட்டு மற்றும் வெளிநாட்டு சுற்றுலாப் பயணிகள் வந்து செல்வதாக தெரிவித்துள்ளார். வடக்கு தாமரைகுளம் உப்பளப் பகுதியில் அரசுக்குச் சொந்தமான 832 ஏக்கர் நிலம் விமான நிலையம் அமைக்க ஏதுவாக உள்ளதாகவும், இங்கு விமான நிலையம் அமைக்க கடந்த 30 ஆண்டுகளுக்கும் மேலாக பல்வேறு தரப்பினர் வலியுறுத்தி வருவதாகவும் குறிப்பிட்டுள்ளார்.
இந்த இடத்தை மத்திய விமானப் போக்குவரத்துத் துறை அமைச்சர்கள் ஏற்கனவே இருமுறை நேரில் ஆய்வு செய்துள்ளதாகவும் மனுவில் தெரிவிக்கப்பட்டுள்ளது. மாவட்டத்தின் தொழில் வளர்ச்சி, பொருளாதார முன்னேற்றம் மற்றும் சுற்றுலா வளர்ச்சிக்கு விமான நிலையம் அவசியம் என்றும், விமான நிலைய வசதி இல்லாததால் சில பெருநிறுவனங்கள் முதலீடுகளை வேறு மாநிலங்களுக்கு மாற்றும் நிலை ஏற்பட்டுள்ளதாகவும் கூறப்பட்டுள்ளது.
மேலும், மகேந்திரகிரி விண்வெளி மையம், குலசேகரப்பட்டினம் ராக்கெட் ஏவுதளம், கூடங்குளம் அணுமின் நிலையம், மணவாளக்குறிச்சி அரிய மணல் ஆலை உள்ளிட்ட முக்கிய உத்திசார் அமைப்புகளின் பாதுகாப்பு மற்றும் அந்தமான்-நிகோபார் தீவுகளில் அமையவுள்ள சர்வதேச வர்த்தகத் துறைமுகத்தின் பாதுகாப்பு ஆகியவற்றுக்கும் விமான நிலையம் பயனுள்ளதாக இருக்கும் என தெரிவிக்கப்பட்டுள்ளது.
விமான நிலையத் திட்டத்திற்காக நில உரிமையாளர்கள் மற்றும் பொதுமக்களுக்கு பங்குகள் வழங்கும் வகையில் திட்டத்தை செயல்படுத்தினால், நிலக் கையகப்படுத்துதல் மற்றும் நிதி தொடர்பான தாமதங்களைத் தவிர்த்து பணிகளை விரைவாக மேற்கொள்ள முடியும் என்றும் மனுவில் கூறப்பட்டுள்ளது. எனவே, நாட்டின் பாதுகாப்பு, சுற்றுலா மற்றும் கன்னியாகுமரியின் பொருளாதார வளர்ச்சியை கருத்தில் கொண்டு 832 ஏக்கர் நிலத்தில் பன்னாட்டு கிரீன்ஃபீல்ட் விமான நிலையம் அமைக்க உடனடி நடவடிக்கை எடுக்க வேண்டும் என கோரிக்கை விடுக்கப்பட்டுள்ளது.
