சென்னை, அக். 21:
சென்னை மற்றும் புறநகர் பகுதிகளில் விடிய விடிய பெய்த கனமழையால் பல்வேறு இடங்களில் மழைநீர் தேங்கியுள்ளது. இதில், எம்.ஜி.ஆர். நகரில் அதிகபட்சமாக 15 செ.மீ. மழை பதிவாகியுள்ளது.
வடபழனியில் 14 செ.மீ., சைதாப்பேட்டை, சென்னை விமான நிலையம், ஆலந்தூர், கோலப்பாக்கம் ஆகிய பகுதிகளில் தலா 13 செ.மீ. மழை பதிவானது. மீனம்பாக்கம், டிஜிபி அலுவலகம், வளசரவாக்கம், மதுரவாயல், மாம்பாக்கம் ஆகிய இடங்களில் தலா 12 செ.மீ. மழை பெய்துள்ளது.
தொடர்ந்து, தாழ்வான பகுதிகளில் தேங்கியுள்ள மழைநீரை அகற்றும் பணியில் மாநகராட்சி ஊழியர்கள் ஈடுபட்டு வருகின்றனர். கனமழையால் பாதிக்கப்பட்ட பகுதிகளில் மழைநீரை வெளியேற்றும் பணிகள் மேற்கொள்ளப்பட்டு வருகின்றன.
