அரசு மருத்துவமனைகளில் நோயாளிகளுக்கு தரமான சிகிச்சை வழங்குவது சவால்! தொடர்ந்து ஐந்து நாட்களாக கோரிக்கை பேட்ச் அணிந்து பணியாற்றும் செவிலியர்கள்

கிருஷ்ணகிரி, ஆகஸ்ட் 5 –

மருத்துவம் மற்றும் மக்கள் நல்வாழ்வுத் துறை சார்பில் “மறு சீரமைப்பு” என்ற பெயரில் செவிலியர் பணியிடங்களைக் குறைக்கும் (ஆட்குறைப்பு) நடவடிக்கையைக் கண்டித்து, கிருஷ்ணகிரியில் PHC, GH மற்றும் மாவட்ட அரசு மருத்துவக் கல்லூரி மருத்துவமனையில் செவிலியர்கள் கோரிக்கைகள் அடங்கிய பேட்ஜ் அணிந்து பணியில் ஈடுபட்டனர்.

தமிழ்நாடு செவிலியர் மேம்பாட்டு சங்கம் சார்பில் நடத்தப்பட்ட இந்த கவன ஈர்ப்பு போராட்டத்தில், கிருஷ்ணகிரி உள்ளிட்ட ஏழு அரசு மருத்துவக் கல்லூரி மருத்துவமனைகளிலிருந்து 210 செவிலியர் பணியிடங்களை வேறு மாவட்ட மருத்துவமனைகளுக்கு மாற்றி வெளியிடப்பட்டுள்ள அரசாணை எண் 204-ஐ உடனடியாக ரத்து செய்ய வேண்டும் என வலியுறுத்தப்பட்டது.

மருத்துவமனைகளில் ஏற்கனவே கடுமையான செவிலியர் பற்றாக்குறை நிலவிவரும் சூழலில், பணியிடங்களை மாற்றுவது பணிச்சுமையை மேலும் அதிகரிக்கும் இதனால் கிருஷ்ணகிரி மக்களுக்கு சரியான மருத்துவ சேவை கிடைப்பது சவாலாகும்.

மேலும், ஒப்பந்த மற்றும் தற்காலிக செவிலியர்களின் பணி நிரந்தர வாய்ப்பையும் பறிக்கும் என்று செவிலியர்கள் தெரிவித்தனர். எனவே, ஆட்குறைப்பு அரசாணையை திரும்பப் பெற்று, நோயாளிகளின் எண்ணிக்கைக்கு ஏற்ப புதிய நிரந்தர செவிலியர் பணியிடங்களை உருவாக்க வேண்டும் என வலியுறுத்தினர்.